Татарстан Премьер-министы Финляндиянең икътисади мәсьәләләр министры белән очрашты

Бүген Татарстан Республикасы Премьер-министры Илдар Халиков Финляндиянең икътисади мәсьәләләр министры Юри Хякямиес әфәнде белән очрашты.

Очрашу III Россия-Ауропа инновацион форумы кысаларында узды.

Искәртеп узабыз, Татарстан Республикасы Хөкүмәт башлыгы Финляндия Республикасында эш сәфәре кысаларында III Россия-Ауропа инновацион форумында һәм XXI Ауропа бизнес-инновацион үзәкләре челтәре конгрессында катнаша.

Очрашуда яклар киләчәктә хезмәттәшлек итү мәсьәләләре, инновацияләр кертү буенча тәҗрибә уртаклашу, башка өлкәләрдә дә элемтәдә тору буенча фикерләште.

Илдар Халиков Татарстан Республикасы Президенты Рөстәм Миңнеханов исеменнән Юри Хякямиес әфәндегә сәламләү сүзләрен белдерде һәм Татарстанны Финляндия белән хезмәттәшлек итү кызыксындыра дип ышандырды.

Татарстан Премьер-министры сүзләренә караганда, мондый дәрәҗәле делегациянең Финляндиягә визиты очраклы түгел. “Без мөнәсәбәтләрне үстерүдә зур потенциал булуын күрәбез”, - диде ул.