ТР Президенты Яр Чаллыда "Көнбагышлар" ("Подсолнухи") микрорайоны төзелеше проекты белән танышты

Бүген ТР Пезиденты Рөстәм Миңнеханов Яр Чаллыда "Көнбагышлар" ("Подсолнухи") микрорайоны төзелешенең проекты белән танышты. Монда күп балалы гаиләләргә җир кишәрлекләре бирелә.

Яр Чаллы мэры Васыйл Шәйхразиев хәбәр итүенчә, бүгенге көндә җир кишәрлеге алу өчен 1824 күп балалы гаиләдән гариза килгән.

"300 гектар җирне шәһәргә Тукай районыннан җир хуҗасы Риф Имамов бүләк итте, - дип сөйләде Васыйл Шәйхразиев. - Әлеге территориядә 2307 йорт урнаштыру, шулай ук социаль инфраструктура: 1980 укучыга мәктәп, 1440 урынлы 6 балалар бакчасы, керү юллары төзү карала".

Рөстәм Миңнеханов торак төзелеше өчен җир кишәрлекләре бирү - күп балалы гаиләләргә ярдәм итүнең иң уңышлы чарасы булуын ассызыклады.

Шул ук вакытта Рөстәм Миңнеханов поселокны инженерия инфраструктурасына тоташтыру мәсьәләсе ачык калуын билгеләде. Аның сүзләренчә, хәзер иң мөһиме - барысын да җир кишәрлеге белән тәэмин итү.

"Инфраструктура буенча эшләрне финанслаштыру мәсьәләсен федераль дәрәҗәдә караячакбыз", - дип билгеләде ул.

Васыйл Шәйхразиев яшь шәһәр халкына уңайлы шартлар тудырылган яңа поселок шәһәр территориясенең дөрес, планлы үсеш үрнәге булачагына ышанычын белдерде.

Соңыннан Рөстәм Миңнеханов "Көнбагышлар" ("Подсолнухи") микрорайонында яшәячәк күп балалы гаиләләрнең вәкилләре белән аралашты.