Рөстәм Миңнеханов Карнеги Меллон университетының инновацион үзәкләрендә булды

Бүген Татарстан Республикасы Президенты Рөстәм Миңнеханов Карнеги Меллон университетының архитектура факультетында “Разумное рабочее пространство” проекты белән танышты. Бу хакта ТР Президенты матбугат хезмәте хәбәр итә. ТР Президентын сәфәрдә ТР Премьер-министры урынбасары – мәгълүматлаштыру һәм элемтә министры Роман Шәйхетдинов, Идел буе федераль университеты ректоры Илшат Гафуров һ.б. озатып йөрде.

Искәртеп узабыз, Рөстәм Миңнеханов Карнеги Меллон университеты эшчәнлеге һәм аның тикшеренү үзәкләре белән танышу өчен Питтсбург шәһәрендә эш сәфәрендә. Бүген Татарстан Хөкүмәте белән Carnegie Mellon University (CMU) – iCarnegie мәгариф бүлекчәләре мөнәсәбәтләр турында меморандум имзаланды.

“Разумное рабочее пространство” (Intelligent Workplace Lab) 630 кв.м мәйданны били. Лаборатория эш бүлмәләре дизайны өлкәсендә тикшеренүләр һәм инновацияләр белән шөгыльләнә. Мондый тикшеренүләр индивидуаль уңайлык тудыру һәм хезмәт җитештерүчәнлеген арттыру исәбенә офис хезмәткәрләре тормышын яхшырта дип күзаллана.

Татарстан Рсепубликасы делегациясе әгъзаларына архитектура һәм дизайн, шулай ук электр энергиясен саклау принциплары, эш урынын яктырту өчен көндезге ут куллану, әйләнә-тирәгә начар йогынтыны киметү таләпләре кергән заманча проектлау һәм төзелеш принципларын тәкъдим иттеләр.

Архитектура мәктәбе директоры Дональд Картер (Donald Carter) яңа шәһәрләрне һәм районнарны планлаштыру проектлары турында сөйләде. Шулай итеп Карнеги Меллон университеты проектлары Һиндстанда, Россиядә, аерым алганда, Мәскәү өлкәсендә һәм Новокузнецкида гамәлгә куелган.

Моннан тыш, кунакларга Питтсбургның 30 нчы еллардан соң хәзерге вакытта кадәр нинди үзгәрешләр кичерү хакында да сөйләделәр. Әгәр элек шәһәр икътисады корыч кыю сәнәгатенә басым ясаса, хәзер икътисадның төп өлкәләре – мәгариф, сәламәтлек саклау, робототехника һ.б.

Карнеги Меллон белгечләре “Иннополис” белән Казан арасында элемтә булдыру өчен җәмәгатьчелек транспорты белән тәэмин итү мөмкинлеген карарга тәкъдим итте. Казанның киләчәк үсеше өчен озак вакытка планлаштыру, мәгарифкә һәм тормыш сыйфатын яхшыртуга инвестицияләр кертү, шәһәр үзәген җәмәгатьчелек транспорты белән тәэмин итү уңай факторлар булып тора.

Аннары Рөстәм Миңнеханов Карнеги Меллон университетының Күңел ачу технологияләре үзәгендә булды. Бирегә укуларын дәвам итү һәм магистр дәрәҗәсен алу өчен төрле академия юнәлешендәге студентлар җыелган. Студентлар ике ел дәвамында мәгариф программасы кысаларында команда белән уртак проектлар өстендә эшләргә өйрәнә – алар дизайнерлар, анимация белгечләре, рәссамнар, ИТ-белгечләр, программистлар. Аннары белгечләр интерактив медиа индустриядә хезмәт куя, “Дисней”, “Пиксар”, “Электроникс Артс” кебек компанияләрдә аларга ихтыяҗ бар.

Күңел ачу технологияләре үзәге директоры Ребекка Ломбарди укыту нигезе сәнгать белән заманча технологияләрне берләштерүдән гыйбарәт дип сөйләде. Студентлар интерактив уеннар, ПК өчен уеннар, анимацион фильмнар эшли. Бүген андый үзәкләр Япония, Испания, Португалиядә бар.

Аннары Татарстан Рсепубликасы делегациясе әгъзалары Робототехника үзәге эшчәнлеге белән танышты, шулай ук Карнеги фәнни үзәгендә булды.