Татарстан Президенты Украина Премьер-министры белән очрашты

Бүген Татарстан Президенты Рөстәм Миңнеханов Украинага эш сәфәре кысаларында Украина Премьер-министры Николай Азаров белән очрашты. Очрашуда Татарстан делегациясенең башка әгъзалары – ТР вице-премьеры – ТР сәнәгать һәм сәүдә министры Равил Зарипов, ТР Президентының халыкара мәсьәләләр буенча ярдәмчесе Радик Гыйматдинов, “Горбунов исемендәге Казан авиация җитештерү берләшмәсе” ААҖ генераль директоры Васил Каюмов катнашты.

Украина Хөкүмәте җитәкчесе Николай Азаров очрашуны ачып, республика бизнес һәм хакимият вәкилләре белән очрашулар нәтиҗәсендә Татарстанның динамик үсеш алучы икътисады белән таныш булуын белдерде. “Татарстан белән безнең мөнәсәбәтләр яхшы”, - дип белдерде Н.Азаров.

2011 елда ирекле сәүдә зонасы турында килешү имзалагач Россия белән Украина тауар әйләнеше 40 процентка артты, дип билгеләп үтте ул. “Әлбәттә, мондый динамиканы тоту кыен, әмма без сәүдә-икътисади мөнәсәбәтләр тагын да үсеш алуын, бернинди каршылыклар булмавын телибез. Бу безнең позиция”, - дип ассызыклады Украина Премьер-министры.

Татарстан Президенты Рөстәм Миңнеханов Николай Назаровка бүген “Антонов” ДП булуын белдерде. “Бүген без ил Президенты һәм Украина Президенты тарафыннан бирелгән йөкләмәне гамәлгә ашыру барышы буенча җентекләп фикер алыштык, - дип белдерде Р.Миңнеханов. - “Горбунов исемендәге Казан авиация җитештерү берләшмәсе” ААҖ предприятиесе үз территориясендә Ан-70 производствосын урнаштырырга тиеш. Без шул уңайдан фикер алыштык, әлбәттә, без бу проектны гамәлгә куюда ярдәм итәрсез дип ышанам”.

Республика башлыгы бүген Украинага эш сәфәре кысаларында Ан-70 самолеты өчен двигательләр әзерләргә тиешле “Мотор Сич” мотор төзелеше заводында булырга җыенуын белдерде. “Ул бүген дә безнең эре партнерларыбызның берсе – “Мотор Сич” двигательләре Казан вертолетларына куела”, - дип искәртте Рөстәм Миңнеханов.

“Бүгенге көндә “КАМАЗ” да Украинага үз продукциясен тәкъдим итә, республика нефтехимия продукциясенә дә ихтыяҗ бар, без тауар җибәрү күләмен артырырга ниятлибез, - дип ассызыклады Татарстан Президенты. – Шул ук вакытта сездән азык-төлек, машина төзелеше сәнәгате продукцияләре алабыз”.

Бүген Татарстан Президенты эшлекле сәфәре кысаларында Запорожьеда “Мотор Сич” мотор төзелеше предприятиесе производствосы белән танышачак.