Илдар Халиков "ЭКОлидер" һәм "Кеше һәм табигать" конкурслары җиңүчеләрен тәбрикләде

Бүген ТР башкаласында “ЭКОлидер” һәм “Кеше һәм табигать” республика конкурсларында җиңүчеләрне бүләкләү тантанасы булды. Тантанада ТР Премьер-министры Илдар Халиков, ТР Дәүләт Советы Рәисе урынбасары Римма Ратникова, Премьер-министр урынбасары – ТР авыл хуҗалыгы һәм азык-төлек министры Марат Әхмәтов, ТР экология һәм табигать ресруслары министры Артем Сидоров, ТР яшьләр эшләре, спорт һәм туризм министры Рафис Борһанов һәм башка рәсми затлар катнашты.

Чараны Артем Сидоров ачты. Ул, лаеклы эшләр бик күп булу сәбәпле, республика конкурсы комиссиясе бик катлаулы сайлау алдында калуын билгеләде. Шулай ук ТР экология һәм табигать ресурслары министры үзенең сәламләү сүзендә тантанада катнашучыларга республиканың экологик иминлеген тәэмин итүдә уңышлар теләде.

Илдар Халиков тантанада катнашучыларны сәламләде. “Экология -без яши торган тирәлек. Аның без яши торган җирнең киләчәге, оныкларыбыз һәм оныкчыкларыбыз киләчәге булуы тагын да мөһим. Без зур тарихка ия, һәм аның бик күп этаплары бар. Без экологиянең ни дәрәҗәдә җиңел юкка чыгарылуын һәм аның торгызылуы ни дәрәҗәдә катлаулы булуын беләбез. Бүген һәр көнне бу мәсьәләләр белән шөгыльләнүчеләргә рәхмәт белдерәсе килә. ТРның эре предприятиеләре ел саен бу чараларга миллардлар кертә. Бу елның лидерлары булган компанияләр моны хокукый вазыйфалардан чыгып эшләми, ә бу аларның җитәкчләренең гражданлык позициясе, күңел теләге, бүгенге тормыш, Татарстан һәм аның киләчәге алдында әхлакый җаваплылык”, - дип билгеләде ТР Премьер-министры.

Илдар Халиков Бөтенроссия әһәмиятенә ия предприятиеләр арасында нәтиҗәле экологик программа өчен конкурста җиңүче “Татнефть” ААҖ бүләк тапшырды. Бүләкләнгәннәр арасында шулай ук “Производственное объединение завод им.Серго” ААҖ (Яшел Үзән), “Майский” теплица комбинаты һ.б. булды.

Бүген бүләкләрне һәр көн ТРда әйләнә-тирәне саклау эшенә зур өлешен кертә торган республиканың алдынгы предприятиеләре һәм оешмалары, мәгариф, социаль өлкә, сәламәтлек саклау учреждениеләре, иҗтимагый оешмалар алды.

Тантанада “Халык контроле” проектында актив катнашучыларны да билгеләделәр. Мәсәлән, Яр Чаллыдан Ләйсән Махиянова, туган шәһәрендә чүп урыннарын фотога төшереп, алар турында язганы өчен, диплом алды. Хәзерге вакытта бу урыннар юкка чыгарылган.

Моннан тыш, иң мөһим экологик мәсьәләләрне хәл итү буенча эшне актив рәвештә яктыртучы иң яхшы журналистлар билгеләнде. Бүләкләнгәннәр арасында “Татар-информ” МА рус редакциясе хәбәрчеләре дә бар. Ә татар редакциясе хәбәрчесе Миләүшә Низаметдинова "Шәһәрләр һәм районнар массакүләм мәгълүмат чаралары "төркемендә "Электрон басмаларда чыккан иң яхшы материал" номинациясендә икенче урын яулады.

Исегезгә төшерик, “ЭКОлидер” һәм “Кеше һәм табигать” конкурслары 2004 нче елда ТР Хөкүмәте карары нигезендә расланды.