Рөстәм Миңнеханов Новосибирск өлкәсе татарлары белән очрашты

Бүген Татарстан Президенты Рөстәм Миңнеханов Новосибирскига эш сәфәре кысаларында татар җәмәгатьчелеге активистлары белән очрашты. Очрашуда ТР Президентының халыкара мәсьәләләр буенча ярдәмчесе Радик Гыйматдинов, Бөтендөнья татарлар конгрессы Башкарма комитеты рәисе Ринат Закиров катнашты.

Хәзерге вакытта Новосибирски өлкәсендә 24 меңнән артык татар яши. Төбәктә 2 эре татар оешмасы – Новосибирски өлкәсе татар иҗтимагый милли-мәдәни төбәк автономиясе һәм Новосибирски өлкәсе татар мәдәният үзәге эшли. Бүген әлеге оешма вәкилләре Татарстан Президенты белән очрашуда катнашты.

Рөстәм Миңнеханов очрашуда катнашучыларга рәхмәт белдерде. Ул Россия күпмилләтле ил һәм халыклар үз гореф-гадәтләрен, телләрен, мәдәниятләрен сакларга тиеш дип билгеләп үтте. “Без республикадан читтә яшәүче татарлар белән элемтәгә керү юлларын эзләргә тиеш”,- дип саный ТР Президенты. Аның сүзләренә караганда, татарлар белән элемтәгә керү өчен Бөтендөнья татарлар конгрессы эшли, “ТНВ-Планета” телеканалы җибәрелә. Якын арада татар телен өйрәтү буенча онлайн-программа эшли башлаячак.

ТР Президенты Новосибирски өлкәсе җитәкчелегенә татарлар тормышына игътибарлы булулары өчен рәхмәт белдерде.

Очрашуда катнашучылар Новосибирски өлкәсе татарлары тормышы турында сөйләде һәм Татарстан башлыгына үтенеч һәм тәкъдимнәр белән мөрәҗәгать иттеләр. ТР белән өлкәнең элемтәсе мәдәният, фән, икътисад кебек төрле өлкәләрдә үсеш алырга тиеш һәм Новосибирски өлкәсе татарлары да бу хезмәттәшлектә актив катнаша алыр иде, дип ассызыклады республика Президенты.