Рөстәм Миңнеханов: "Казахстан Республикасы - Татарстанның төп сәүдә партнерларының берсе"

ТР һәм Казакъстанны борынгы партнерлык мөнәсәбәтләре бәйли, Казакъстан Республикасы - Татарстанның төп сәүдә партнерларының берсе – үткән елда республикаларыбызның товар әйләнеше 900 миллион АКШ доллары булды. Бу хакта бүген ТР Президенты Рөстәм Миңнеханов Казакъстан белән Россия төбәкара хезмәттәшлеге IX форумы чаралары кысаларында чыгыш ясаганда хәбәр итте.

Форум Павлодарда “Дуслык Йорты” бинасында (Казакъстан Республикасы) үтте, дип хәбәр итә ТР Президенты матбугат хезмәте. Форум эшендә РФ Президенты Владимир Путин һәм Казакъстан Республикасы Президенты Нурсолтан Назарбаев катнашты.

Рөстәм Миңнеханов хезмәттәшлек, барыннан да бигрәк, машина төзелешендә тормышка ашырыла, дип билгеләде. “Бу, барыннан да бигрәк, “КАМАЗ” ААҖ, - диде ул. – “КАМАЗ” ААҖ өчен Казакъстан Республикасы сату күләме буенча Россиядән соң икенче урында тора, 2011 нче елда монда 3 мең автомобиль китертелде”.

Моннан тыш, Рөстәм Миңнеханов “КАМАЗ” ААҖ белән уртак предприятие эшләвен ( 2005 нче елда булдырылган "КАМАЗ-Инжиниринг”), автомобильләрнең бер өлеше Казакъстанда җыелуын билгеләде. Шулай ук уртак предприятие Казан вертолет заводы белән булдырылган.

Яңа уртак проектлардан Рөстәм Миңнеханов Карагандин өлкәсендәге авыл хуҗалыгына бәйле “МВЕН” (Казан) компаниясе проектын атады. Шулай ук Казакъстан территориясендә Татарстанның “КЭР-Холдинг” компаниясе белгечләре эшли.

Рөстәм Миңнеханов ТР белән Казакъстан төбәкләре арасындагы тыгыз элемтәләрне билгеләп үтте. Агымдагы елда Актүбә өлкәсендә сәүдә миссиясе оештырылды, татар милли бәйрәме – Сабантуй уздырылды.

“Бүген Казакъстанда 220 мең татар яши, - дип билгеләде Рөстәм Миңнеханов. – Безнең алар белән бик яхшы элемтәләр, һәм мондый мәдәни чараларны уздыру аларны сакларга ярдәм итә”.

Рөстәм Миңнеханов форум кысаларында бик файдалы очрашулар булуын билгеләде. Ул шулай ук нефть химиясе өлкәсендә хезмәттәшлек итү мөмкинлекләре турында сөйләшү булуын һәм, якын арада тәҗрибә белән алмашу һәм алдагы вакытта бергәләп эшләү өчен, Казакъстаннан Татарстанга делегация килүен белдерде.

“Көнбатыш Европа-Көнбатыш Кытай” халыкара транспорт коридоры төзелеше проекты буенча эшкә килгәндә, без бу мәсьәләдә шулай ук актив эшлибез, дип белдерде ТР Президенты, һәм мин, бу транспорт юлы безне тагын да якынайтыр, дип өметләнәм.