Рөстәм Миңнеханов: “Без федераль үзәк һәм муниципалитетлар белән бер-беребезне аңларга тиеш”

Россия төбәкләренең уңышлы үсеш алуында субъект җитәкчеләренең федераль үзәк органнары һәм муниципалитет җитәкчелекләре белән бер-берсен аңлавы төп шартларның берсе булып тора. Бүген бу хакта ТР Президенты “Саклык банкы” “Сочи-2012” XI Халыкара инвестицион форумы кысаларында оештырган эшлекле иртәнге ашта белдерде.

Быел традицион эшлекле төшке ашта РФ төбәкләренең көндәшлелеккә сәләтлеге буенча фикер алыштылар. Анда Россия Хөкүмәте әгъзалары, төбәк җитәкчеләре, бизнес һәм экспертлар бергәлеге вәкилләре катнашты. Фикер алышу модераторы буларак, “Саклык банкы” ААҖ идарәсе рәисе Герман Греф чыгыш ясады.

Төшке ашта, аерым алганда, РФ вице-премьеры Дмитрий Козак, доктор Ицхак Кальдерон Адизес чыгыш ясады. Россия элемтә һәм массакүләм коммуникацияләр министры Николай Никофоров үз чыгышында хакимият белән гражданнарның заманча элемтә технологияләрен куллануы көндәшлелеккә сәләтлелекнең яңа факторы булып тора дип билгеләп үтте.

Татарстан Президенты Рөстәм Миңнеханов Герман Грефның төбәкнең үсеш серләре турындагы соравына җавап бирде. Республика башлыгы фикеренә караганда, уңышлы эшләүнең нигезе бер-береңне аңлаудан гыйбарәт. “Без командада, федераль үзәк, муниципалитетлар белән дә бер-беребезне аңларга тиеш”, - дип саный ТР Президенты.

Рөстәм Миңнеханов федераль үзәк белән мөнәсәбәтләр тәҗрибәсе хакында республика җитәкчелеге гамәлдәге кагыйдәләр буенча эшли дип билгеләп үтте. “Гамәлдәге кагыйдәләр һәрвакыт камил булмаса да алар буенча эшләргә кирәк. Без шул кагыйдәләр буенча эшлибез, федераль үзәктән финанслау шарты белән төрле конкурсларда катнашабыз, - диде Р.Миңнеханов. Алар безне алга барырга этәрә”.

Төбәкнең үсеше өчен мәгариф өлкәсенә ярдәм итү зарур дип саный Рөстәм Миңнеханов. Аның сүзләренә караганда, мәгариф чылбырына - балалар бакчасыннан алып югары уку йортына кадәр игътибар бирү кирәк.

“Икенчесе – ул инфраструктура. Без Кама сәнәгать кластерын гамәлгә куябыз, ә ул энергетика, тимер юл, кадрлар әзерләүне таләп итә. Болар барысы да федераль үзәктәге хезмәттәшләр белән бергә чынга ашырылырга тиеш”, - дип белдерде Р.Миңнеханов.