Рөстәм Миңнеханов: “Без Татарстанда Люксембург бизнесына ярдәм итәргә әзер”

Татарстан җитәкчелеге ТРда бизнес ачуда һәм аны алып баруда Люксембург компанияләренә ярдәм итәргә әзер һәм алар белән хезмәттәшлек үсешенә өметләнә. Бу хакта бүген республика Президенты Рөстәм Миңнеханов Казанда булган Люксембург делегациясе вәкилләре белән эшлекле иртәнге аш вакытында белдерде.

Очрашуда Люксембург икътисад һәм тышкы сәүдә министры Этьен Шнайдер, ТР мәгълүматлаштыру һәм элемтә министры Роман Шәйхетдинов, ТР Президентының халыкара мәсьәләләр буенча ярдәмчесе Радик Гыйматдинов, ТР Инвестицион үсеш агентлыгы башлыгы Линар Якупов катнашты.

ТР Президенты бизнесменнар белән очрашуны ачканда республиканың Люксембург белән, бигрәк тә, югары технологияләр өлкәсендә хезмәттәшлек итү әһәмиятен билгеләде. Ул, аерым алганда, бизнесменнарның игътибарын “Алабуга” МИЗына юнәлтте. Татарстан башлыгы сүзләренчә, бүген анда 3 миллард доллар инвестиция белән 31 резидент теркәлгән. Шулай ук Рөстәм Миңнеханов Казанда сәфәр вакытында Люксембург эшмәкәрләре IT өлкәсендәге алдынгы проектлар белән дә таныша алуларын хәбәр итте. “Люксембург – Европада иң үсеш алган дәүләтләрнең берсе, һәм без аның мөмкинлекләрен файдаланырга телибез”, - дип белдерде Рөстәм Миңнеханов. Ул, Казанга бизнесменнарның сәфәрен оештырган өчен, Люксембург Премьер-министры Жан-Клод Юнкер, икътисад һәм тышкы сәүдә министры Этьен Шнайдер һәм Россиядә Люксембург илчесе Пьер Феррингка рәхмәтен белдерде.

Люксембург икътисад һәм тышкы сәүдә министры Этьен Шнайдер Люксембург Россиянең иң мөһим икътисади хезмәттәшләренең берсе булуын хәбәр итте. 2012 нче елның беренче яртыеллыгы ахырына Россиядә Люксембург инвестицияләре күләме 1,5 триллион сум тәшкил иткән. “Мин, Татарстан - бик күпне ышандыра ала торган партнер, дип саныйм. Һәм без монда булуыбызга, төбәк турында күпне белә алуыбызга шат”, - дип белдерде Этьен Ферринг.

Люксембург сәүдә палатасы вице-президенты Роберт Денневальд Рөстәм Миңнехановка бизнес-делегация составындагы үз хезммәттәшләрен тәкъдим итте. 20 Люксембург компаниясе вәкиле үз мөмкинлекләре һәм Татарстан белән хезмәттәшлек перспективалары турында сөйләделәр.

Рөстәм Миңнеханов фикеренчә, Татарстанны Люксембург белән финанслар, консалтинг һәм аудитор хезмәте, туризм өлкәсендә хезмәттәшлек кызыксындыра.

“Казан, Татарстан туризм үзәгенә әйләнә. Без транспорт, кунакханә инфраструктурасын үстерәбез. Һәм без туризм өлкәсендә аңлашу таба алабыз, дип уйлыйм”, - дип саный ТР Президенты.