Рөстәм Миңнеханов Төркия автокомпонентлар җитештерүчеләрен Татарстанда эшләргә чакырды

Бүген Төркиянең Бурса шәһәрендә автомобиль төзелеше һәм автокомпонентлар җитештерү өлкәләрендә хезмәттәшлек итү буенча Татарстан-Төркия эшлекле форумы узды. Анда Татарстан Президенты Рөстәм Миңнеханов катнашты.
Форум эшендә Татарстан белән Төркиянең эшлекле даирәсеннән 200 дән артык вәкил катнаша. Алар Татарстан Республикасының 20 дән артык предприятиесен һәм Төркия Республикасының 50 дән артык компаниясен тәкъдим итә.
Татарстан эшлекле даирәсе вәкилләре Төркиягә сәфәр кысаларында, автокреслолар җитештерүче “Мартур”, автомобильләрнең металл кузов детальләрен җыючы “Джошкуноз” компанияләрендә, Автомобиль сәнәгате экспортерлары ассоциациясе техник сәнәгать лицеенда булды.
Бүген форумның пленар утырышында Төркия һәм Татарстан компанияләре вәкилләре чыгыш ясады. Автомобиль индустриясе экспортерлары оешмасы рәисе Улу даг Орхан Сабунджу Төркия дөньяда һәм Ауропада автомобильләр һәм автокомпонентларның иң эре экспортерлары булып тора. 2011 елда илдә 1,6 миллион автомобиль җитештерелгән, аларның өчтән ике өлеше читкә чыгарылган. 2023 елда Төркия ел саен 4 миллион автомобиль чыгарырга һәм экспорт күләмен 75 млрд. долларга җиткерергә ниятли. “Махсус икътисади зоналар” ААҖ генераль директоры Олег Костин Россиядә эшли торган МИЗ системасы турында сөйләде. Бүген Татарстанда урнашкан “Алабуга” МИЗ уңышлы эшли, дип билгеләп үтте ул.

“КАМАЗ” ААҖ генераль директоры Сергей Когогин Төркия эшмәкәрләренә Россиянең йөк машиналары җитештерүче иң эре компаниясе турында сөйләде. Компания җитәкчесе мәгълүматларына караганда, 2012 елда “КАМАЗ” 47 мең машина җитештерергә, шул исәптә 6 меңне экспортка чыгарырга планлаштыра.
“Форд-Соллерс” компаниясе башкарма директоры Адиль Ширинов Татарстанда “Форд” автомобильләре һәм двигательләр җитештерүне оештыру турындагы план турында сөйләде. Аның мәгълүматларына караганда, Алабуга һәм Чаллы заводларында ел саен 172 мең машина чыгарыла. “Форд-Соллерс” автокомпонетларны локальләштерү буенча актив эш алып бара һәм Төркия компаниясенә зур өметләр баглый, ул Татарстанда үз производствосын ача алыр иде.

“Татнефтехиминвест-холдинг” ААҖ генераль директоры Рафинат Яруллин Татарстанның нефть химиясе комплексы мөмкинлекләре турында сөйләде. Ул автокомпонентлар производствосы өчен мөһим чимал – полимер җитештерә.

“Алабуга” МИЗ генераль директоры Тимур Шаһивәлиев Төркия бизнесменнарына махсус икътисади зонаның мөмкинлекләрен тәкъдим итте. Ул МИЗда производство мәйданчыкларын арендага бирү планлаштырылуын белдерде. Аренда цехларының гомуми мәйданы 200 мең кв. метр тәшкил итәчәк.
Тимур Шаһивәлиев Рөстәм Миңнехановка һәм Төркия Республикасы җитәкчелегенә Истанбул белән “Бегишево” аэропорты арасында туры авиаочыш оештыруны сорап мөрәҗәгать итте.
Төркия Республикасы икътисад министры вазыйфаларын башкаручы Мостафа Север үз докладында Төркиянең икътисади үсеше турында белдерде һәм тышкы икътисади элемтәләрне үстерү әһәмиятле булуын билгеләп үтте. “Без Татарстан белән сәүдә хезмәттәшлеген киңәйтергә өметләнәбез, - дип белдерде М.Север. – Безнең инвесторлар Татарстанның Россиядә бизнес алып бару өчен яхшы урын икәнлеген белә.”
Ул бүгенге форум Татарстан белән Төркия арасындагы дустанә һәм эшлекле мөнәсәбәтләрне ныгытачак дип ышануын белдерде.
Татарстан Президенты Рөстәм Миңнеханов форумның пленар утырышы ахырында Татарстан белән Төркия бизнесменнарының андый очрашулары традициягә әйләнде дип белдерде. Ул Төркия Икътисад министрлыгына, Бурса җитәкчелегенә, форумны оештыручыларга һәм катнашучыларга рәхмәт белдерде. “Безнең өчен Татарстан белән мөнәсәбәтләрне үстерүгә зур игътибар биргән Төркия Республикасы җитәкчелеге ярдәме мөһим”, - диде Рөстәм Миңнеханов.
Ул Төркия автокомпонентлар җитештерүчеләрне Татарстанда эшләргә чакырды. Ул киләсе шундый форумны 2013 елда Чаллыда үткәрергә тәкъдим итте һәм Бурса губернаторы Шихабеттин Харпут җитәкчелегендә Төркия эшмәкәрләрен анда катнашырга чакырды.

Форумның пленар утырышы кысаларында “Джошкуноз-холдинг” белән “Форд-Соллерс” компанияләре арасында килешү имзаланды.
Шулай ук Дженка Йоней белән “КАМАЗ” ААҖ генераль директоры Сергей Когогин “Джошкуноз-холдинг” һәм “КАМАЗ” ААҖ арасында хезмәттәшлек нияте турындагы беркетмә имзалады.

Бүген Бурсада форум кысаларында Татарстан белән Төркия бизнесы вәкилләре арасында автокомпонент производствосына багышланган адреслы очрашулар планлаштырылган.