Илдар Халиков: “Татарстанның инвестицион мәйданнары кешеләргә реальләшү өчен киңлек бирә”

Халыкара инвестицияләрне җәлеп итү буенча Татарстанның яңа проектлары республиканың бизнес-климатын гына яхшыртып калмый, яшьләргә реальләшү мөмкинлеген дә бирә. Бүген бу хакта ТР Премьер-министры Илдар Халиков чит ил инвестицияләре буенча беренче Мәскәү халыкара форумында белдерде.

“Инвестицион проектларны тормышка ашырганда, без алган тәҗрибә компетентлы команда, яхшы инфраструктура, инвесторлар белән ачык булу нәтиҗә биргәнен күрсәтә”, - дип билгеләде ТР Хөкүмәте башлыгы.

Мисал итеп, Халиков “Мастер” Кама индустрия парк”ын китерде. Монда 2012 нче елның 9 аена керем 641 миллион АКШ долларын тәшкил иткән. Бүген парк мәйданы - 430 мең квадрат метрдан зуррак.

Инвестицияләрне җәлеп итүдә икенче уңышлы мисал – “Идея” технопаркы. 2012 нче елның 9 аена аның кереме 80 миллион АКШ долларын тәшкил иткән.

ТР Хөкүмәте башлыгы хәзер республикда тагын бер “амбициоз проект” тормышка ашырылуын билгеләде: “Иннополис” инновацион шәһәре төзелә. Ул барлык кирәкле коммуникацияләр һәм инфраструктура белән тәэмин ителеп, Казаннан ерак түгел урында урнашачак, дип ассызыклады Халиков. Алдынгы бәяләр буенча, “Иннополис” 100-120 миллиард сум инвестиция җәлеп итәчәк.

“Бу яңа шәһәр инициативалы кешеләргә үз идеяләрен һәм мөмкинлекләрен нәтиҗәле тормышка ашырырга ярдәм итәчәк”, - дип билгеләде Халиков.

ТР Премьер-министры ирешелгән уңышларга карамастан, Татарстанның һәрдаим республикада бизнес-климатны яхшырту юлларын эзләвен һәм актив рәвештә Россиянең башка төбәкләре белән инвестицияләр җәлеп итү тәҗрибәсен алмашуын ассызыклады.