Еллык планны үтәү өчен Татарстанга 630 мең кв. метрга якын торак төзергә һәм файдалануга тапшырырга кирәк

Татарстан торак кертү буенча үз позицияләрен саклап килә. 2012 нче елның 9 ае нәтиҗәләре буенча, республика РФ субъектлары арасында өченче һәм Идел буе федераль округы буенча беренче урынны алган. Бу хакта бүген торак төзелеше һәм аны гамәлгә кертү мәсьәләләре буенча ТР Хөкүмәт йортында ТР Президенты Рөстәм Миңнеханов катнашында узган республика киңәшмәсендә, ТР Төзелеш, архитектура һәм ТКХ министры Ирек Фәйзуллин хәбәр итте.

Республикада 1 миллион 851,5 мең кв. м торак кертелгән (еллык планның 74,7 проценты). Калган вакытта тагын 628,5 мең кв.м төзергә һәм файдалануга тапшырырга кирәк. Аларның 170 мең кв. м – соципотека программасы буенча торак, 106 мең кв.м. – шәхси торак, 350 мең кв.м дан артыгы – коммерция торагы.

14 муниципаль берәмлек торак кертү буенча еллык планны тулы күләмдә үтәгән (Әгерҗе, Аксубай, Апас, Балтач, Буа, Югары Ослан, Биектау, Лаеш, Нурлат, Питрәч, Балык Бистәсе, Саба, Тәтеш, Тукай). 18 муниципаль берәмлектә еллык бирем 80 проценттан артык мәйданда башкарылган. Аларның тугызында (Актаныш, Алексеевски, Әлки, Әтнә, Кайбыч, Лениногорски, Менделеевски, Мөслим, Чирмешән) еллык план үтәлеше 90 проценттан артык.

2012 нче елда социаль ипотека программасы буенча төзелүче 26 торак йортның 21ендә төзелеш тәмамлану стадиясендә (техник әзерлек – 90 проценттан артык), 5 объект югары әзерлек дәрәҗәсендә.

Республикада Бөек Ватан сугышының 721 ветераны өчен 106 йорт төзелеше дәвам итә. 80 объект – югары әзерлектә, уртача әзерлектә 21 объект исәпләнә, 5 объектка түбән әзерлектә булу сәбәпле муниципаль берәмлекләр тарафыннан аеруча зур игътибар кирәк, ди Ирек Фәйзуллин.

ТР Төзелеш, архитектура һәм ТКХ министры сүзләренә караганда, алданган өлешчеләр йортларында эшләрне тәмамлауга аерым игътибар юнәлтү зарур. Казанда төзелүче 14 объектның дүртесендә графиктан калышу күзәтелә. Бу йортларның ноябрь-декабрьдә кертеләчәген исәпкә алганда, Ирек Фәйзуллин Казан Башкарма комитетына ТР буенча дәүләт төзелеш күзәтчелеге инспекциясе белән берлектә, бу йортларда төзелеш барышын көндәлек режимда тотарга кушты.

“Ел ахырына кадәр бу бурычны үтәргә тиешбез”, - диде ТР Төзелеш, архитектура һәм ТКХ министрлыгы башлыгы.

Югарыда әйтелгәннәрне йомгаклап, республика Президенты торак кертү буенча эшне көчәйтергә, шул ук вакытта сыйфат турында да онытмаска һәм министр яңгыраткан мәсьәләләргә игътибар юнәлтергә киңәш итте.