Рөстәм Миңнеханов Леонтьев үзәге белгечләре белән очрашты

Бүген Татарстан Президенты Рөстәм Миңнеханов “Леонтьев үзәге” Халыкара социаль-икътисади тикшеренүләр үзәге” ЯАҖ делегациясе белән очрашты.

ТР Хөкүмәт йортында узган очрашуда “Леонтьев үзәге” генераль директоры Ирина Карелина, фәнни-тикшеренүләр программалары директор-координаторы Леонид Лимонов, территорияне стратегик планлаштыру бүлеге җитәкчесе Борис Жихаревич, ТР Президентының икътисади мәсьәләләр буенча ярдәмчесе Айрат Хәйруллин, республиканың икътисад министры Мидхәт Шаһиәхмәтов, Татарстан Республикасы Дәүләт Советының бюджет, салым һәм финанслар комитеты рәисе Морат Гаделшин катнашты.

Леонтьев үзәге — 1991 елда Санкт-Петербург мэры Анатолий Собчак һәм икътисад буенча Нобелев премиясе лаурета Василий Леонтьев инициативасы буенча гамәлгә куелган халыкара социаль-икътисади тикшеренүләр үзәге. Ул төбәк икътисады һәм финанслар проблемалары буенча тикшеренүләр оештыру һәм үткәрү, федераль, төбәк һәм муниципаль идарә органнарына стратегия планнары, социаль-икътисади үсеш проектлары һәм программалары эшләгәндә консультация күрсәтү хезмәте белән шөгыльләнә.

1-2 ноябрьдә "Леонтьев үзәге” проекты кысаларында “Татарстан авылы” һәм “Транспорт-коммуникацион киңлек” эксперт төркеме “2030 елга кадәр Татарстан Республикасы үсеш стратегиясе"н эшләүгә әзерлек буенча Казанга мәгълүмат җыю һәм эш өчен әңгәмәләр алырга килгән иде.

Очрашуда яклар эксперт төркеменең стратегик планнарны һәм республиканың социаль-икътисади үсеш программаларын эшләүдә эш нәтиҗәләре һәм хезмәттәшлек перспективалары буенча фикерләште.