Игорь Шувалов Казанның торак комплексында урнашкан балалар бакчасында булды

Казанның торак йортларда балалар бакчасы ачу буенча яхшы тәҗрибәсе бар. Бу хакта бүген Россия Хөкүмәте рәисенең беренче урынбасары Игорь Шувалов Татарстан башкаласына эшлекле сәфәре кысаларында, “Егоза” шәхси балалар бакчасында белдерде. И.Шуваловны ТР Президенты Рөстәм Миңнеханов, Казан мэры Илсур Метшин озатып йөрде.
Агымдагы елның сентябрендә Игорь Шувалов үткәргән киңәшмәдә илкүләм программалар кысаларында торак йортларда балалар бакчалары оештыру мөмкинлеге мәсьәләсе каралды. Киңәшмә нәтиҗәләре буенча РФ вице-премьеры Роспотребнадзорга андый учреждениеләргә артык таләпләр куймаска тәкъдим итте. Менә бүген РФ беренче вице-премьеры Казанда шундый балалар бакчасының берсендә булды.
“Егоза” шәхси балалар бакчасы яңа торак йортның икенче катында урнашкан. Төзүче компаниягә садик оештыру өчен 8 күпбүлмәле фатир бүлеп бирелгән. Әлеге балалар бакчасында 2-7 яшьлек 100 бала тәрбияләнә. Ул 7.30 сәгатьтән 21 сәгатькә кадәр эшли. Балалар өчен инглиз теле, татар теле, шәрыкъ биюләре, шахмат, футбол түгәрәкләре эшли. Шунда ук шәфкать туташы бар, атнага өч тапкыр табиб килә.
Игорь Шувалов бүлмәләрне нәтиҗәле файдалануга игътибарны юнәлтте. Төркемнәрдә җайлы караватлар куелган, балалар аерым кафеда ашый.
ТР Президенты Рөстәм Миңнеханов шулай ук “Егоза”ны торак йортта балалар бакчасы оештыруның оптималь варианты дип атады.
Балалар бакчасы директоры Наталья Реснянская сөйләвенчә, Роспотребнадзор тарафыннан кабул ителгән яңа нормативлар оештыру эшен сизелерлек кыскарткан. Казанда барлыгы 10 шәхси балалар бакчасы эшли.  Ихтыяҗ зур булу сәбәпле, “Егоза”га урнашу өчен 2014 елга язылу бара.

Кунаклар балалар белән аралашты һәм чыршыда үз сувенирларын калдырды.