Рөстәм Миңнеханов Давос форумы ачылышында катнашты

23 гыйнвар 2013 ел., чәршәмбе
Бу көннәрдә Татарстан Президенты Рөстәм Миңнеханов Швейцариянең Давос шәһәрендә эш сәфәрендә. Сәфәрнең максаты – Россиянең рәсми делегациясе составында Бөтендөнья икътисади форумы ачылышында катнашу. Россия делегациясенә РФ Премьер-министры Дмитрий Медведев җитәкчелек итә.

Быелгы форум мәйданында барлык фикер алышулар “Тотрыклы динамизм” темасына берләшкән. Очрашуның төп шигаре – “Эшмәкәрлек барлык дөнья җәмәгатьчелеге мәнфәгатьләрендә”.

Кичә Рөстәм Миңнеханов Россия рәсми делегациясе составында форумның ачылышында катнашты, дип хәбәр итә Президентның матбугат хезмәте. Моннан тыш, Татарстан Президентының эшлекле очрашулары планлаштырылган. Аерым алганда, Бөтендөнья икътисади форумына нигез салган профессор Клаус Шваб белән очрашуда алга таба хезмәттәшлек перспективалары каралган.

Белешмә өчен: 1971 елдан бирле ел саен Давоста оештырыла торган Бөтендөнья икътисади форумы икътисад темаларына дискуссияләр оештырыла торган эре мәйданнарның берсе санала. Традиция буларак, ул берничә көнгә үзенә ил башлыкларын, дөнья бизнесы лидерларын, танылган галимнәрне, икътисадчылар һәм политологларны җыя. Давос очрашулары кысаларында дистәләгән пленар утырышлар, семинарлар, “түгәрәк өстәл”ләр, шулай ук дәүләт эшлеклеләренең ике яклы, күп яклы очрашулары оештырыла. Давос очрашуларында рәсми булмаган шартларда мөһим сәяси һәм икътисади проблемалар күтәрелә. Давос дискуссияләрендә икътисади елның проблемалары билгеләнә.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International