Рөстәм Миңнеханов: Татарстан «Майкрософт» компаниясе белән системалы рәвештә эш итә

«Майкрософт» (Microsoft) компаниясе җитәкчеләре белән Татарстан Республикасы Хөкүмәт Йортында Татарстан Республикасы Президенты Рөстәм Миңнеханов очрашты.
Чарада киләчәктә дә компания белән багланышлар алып бару һәм «Майкрософт» программалы продуктларын куллану мәсьәләләре турында сүз барды. Рөстәм Миңнеханов бүген Татарстан «Майкрософт» компаниясе белән системалы рәвештә эш итүе турында әйтеп китте. Безнең үзара яхшы эшлекле мөнәсәбәтләр урнашты, диде ул, һәм Татарстан Республикасы «Майкрософт» компаниясе продукциясен куллануны законлаштыруга регионнар арасында беренчеләрдән адым ясады. Очрашуда Көнчыгыш һәм Үзәк Европадагы Microsoft вице-президенты Дон Грентем (Don Grantham), Татарстан Республикасы Премьер-министры урынбасары – ТР Мәгълүматлаштыру һәм элемтә министры Роман Шәйхетдинов, Татарстан Республикасы Президенты ярдәмчесе Айрат Хәйруллин һәм башкалар катнашты.

Искә төшерик, «Майкрософт» җитәкчелеге Казанда татар телендәге Microsoft Windows 8 татарча операция системасын тантаналы рәвештә эшләтеп җибәрү церемониясендә катнаша (ИТ-парк, Казан, Петербургская ур.).