Рөстәм Миңнеханов: "ИХО белән хезмәттәшлек Татарстан өчен бик файдалы"

Татарстан Республикасы Ислам хезмәттәшлеге оешмасының шактый күп бүлекчәләре белән актив рәвештә хезмәттәшлек итә һәм үзара файдалы мөнәсәбәтләрнең киләчәктә дә үсүенә исәп тота. Бу хакта Татарстан Республикасы Президенты Рөстәм Миңнеханов ИХО генераль секретаре Әкмәледдин Ихсаноглу белән бүгенге очрашуда белдерде. Очрашу Татарстан делегациясенең Согуд Гарәбстанына визиты кысаларында Җиддәдә узды.

Әкмәледдин Ихсаноглу Рөстәм Миңнехановны ИХО штаб-квартирасында сәламләде һәм генсекның шәхси чакыруы буенча узучы визит өчен рәхмәтен белдерде. Ул Татарстан Республикасы Президентына республика өчен кызык булырлык киләчәктә уздырылачак чаралар турында сөйләде. Аерым алганда, ИХО генераль секретаре республика делегациясен агросәнәгать форумына чакырды, анда Татарстан үз авыл хуҗалыгы секторының инвестиция мөмкинлекләрен күрсәтә алачак.  

Шулай ук, Әкмәледдин Ихсаноглу сүзләренчә, ИХО Татарстанга Болгар һәм Свияжскны ЮНЕСКО мирасы исемлегенә кандидатлар буларак кертүгә ярдәм итәчәк. "Хәләл продукция җитештерүгә килгәндә исә, багланышлар ныгый бара", - диде Ә.Ихсаноглу.

Ул Рөстәм Миңнехановка Татарстан белән Ислам илләре арасында фән һәм мәгариф өлкәләрендә хезмәттәшлекне җайга салырга тәкъдим итте. "Бу юнәлештә перспективалар күп, чөнки сезнең илегез һәм республикагыз алга киткән", - дип белдерде ИХО генераль секретаре.

"Без ИХОның төрле бүлекчәләре белән актив эшлибез, - диде үзенең җавап сүзендә Татарстан Республикасы Президенты. - Без Ислам дөньясы илләре белән хезмәттәшлекне ныгыта барабыз, икътисад, финанслар, инвестицияләр җәлеп итү өлкәсендәге багланышларны ныгытабыз. Һәм безнең исәпләвебезчә, ИХО белән хезмәттәшлек республика өчен бик файдалы һәм перспективалы".

Рөстәм Миңнеханов Әкмәледдин Ихсаноглуга Татарстанда ИХО эгидасы астында даими рәвештә чаралар уздырган өчен рәхмәт белдерде. "Бу чаралар безнең мөнәсәбәтләрнең нигезен формалаштыра", - дип ассызыклады Татарстан Республикасы Президенты.

Татарстан белән Ислам илләре арасында агросәнәгать комплексында хезмәттәшлекнең перспективалары турында сөйләгәндә Рөстәм Миңнеханов республика җитәкчелегенең төрле авыл хуҗалыгы күргәзмәләрендә һәм форумнарында катнашу ниятен раслады. "Безнең өчен барлык күргәзмәләрдә катнашу, үзебезнең мөмкинлекләрне тәкъдир итү бик мөһим. Без шулай ук эшкуарлар урыннарда безнең агросәнәгать комплексын бәяләсеннәр өчен бизнес-делегациянең Татарстанга визитын оештырырга телибез", - дип белдерде Татарстан Республикасы Президенты.

Рөстәм Миңнеханов сүзләренчә, хәзерге вакытта Россиядә бизнесның мөһим, әмма җитәрлек дәрәҗәдә алга китмәгән юнәлешләренең берсе – хаҗ оештыру һәм хәләл стандартлар буенча продукция җитештерү. Татарстан Республикасы Президенты Татарстанның һәм Россиянең мөмкин кадәр күп кешесе Мәккәдәге изге урыннарга хаҗ кыла алсын, ә хәләл продукция республиканың үзендә куллану өчен генә түгел, шулай ук экспорт өчен дә җитәрлек күләмнәрдә җитештерелсен өчен ИХОның бу мәсьәләләрдә ярдәменә өметләнүен белдерде. 

Фән һәм инновацияләр өлкәсендә эре проектларны гамәлгә ашыру өчен, Рөстәм Миңнеханов фикеренчә, шулай ук башка илләр белән хезмәттәшлек итәргә кирәк. "Безнең иң эре проектлар республикада гына, хәтта Россиядә генә йомылып калырга тиеш түгел – чит ил партерларын да җәлеп итәргә кирәк, - дип саный Татарстан Республикасы Президенты. – Без ИХОның фән һәм мәгариф проектларында партнерлар сыйфатында катнашырга әзер".
Шулай ук, Рөстәм Миңнеханов сүзләренчә, ИХО линиясе буенча студентларны Казанга җәлеп итү мөмкинлеге буенча да якларга фикер алышырга кирәк. "Безнең университетларның җидти мөмкинлекләре бар һәм аларны кулланырга кирәк", - дип белдерде Әкмәледдин Ихсаноглуына Татарстан Республикасы Президенты.

Ниһаять, Татарстан белән ИХО арасында хезмәттәшлекнең тагын бер юнәлеше - туризмны үстерү. Рөстәм Миңнеханов билгеләп үткәнчә, республиканың хәзер Ислам илләре белән транспорт элемтәләре шактый яхшы һәм туристлар Болгар белән, Татарстанның бүтән изге урыннары белән кызыксынырга мөмкин.

Очрашу азагында Рөстәм Миңнеханов Әкмәледдин Ихсаноглуга Татарстанга булган игътибары өчен рәхмәт белдерде "Сезнең эшегез, командагыз эше аерым нәтиҗәләр китерде инде, һәм мин ышанам ки, тагын да зуррак нәтиҗәләргә ирешелер дип, - диде Татарстан Республикасы Президенты. – Ә сезнең белемнәрегез һәм тәҗрибәгез безнең өчен һәрвакыт файдалы булачак".