Илдар Халиков Татарстанның Саба районында авыл хуҗалыгы техникасына хезмәт күрсәтү буенча John Deere сервис үзәге ачылуда катнашты

Бүген Татарстан Республикасының Саба муниципаль районында авыл хуҗалыгы техникасына хезмәт күрсәтү буенча John Deere махсуслаштырылган сервис үзәге ачылды.

Үзәк ачылышы тантанасында Татарстан Республикасы Премьер-министры Илдар Халиков, ТРның Саба муниципаль районы башлыгы Рәис Миңнеханов, шулай ук TerraPro компаниясе генераль директоры Майкл Сноу һ.б. катнашты.
John Deere махсуслаштырылган сервис үзәген рәсми дилер - TerraPro компаниясе тәкъдим итә.

Илдар Халиков тантанада катнашучыларны сәламләп, бу проектны булдыруда катнашучыларны тәбрикләде.
“Дөньяның машина төзелеше легендасы - John Deere компаниясе Татарстан районнарының берсенә килде. Безнең авыл хуҗалыгы җитештерүчеләре нәрсә кирәклеген сайлый ала, һәм барысы да яхшы булуга ышана ала, диде Илдар Халиков.
Аның сүзләренчә, John Deere компниясенең килүе очраклы түгел. Бүген республика авыл хуҗалыгы иң үскән Россия төбәкләренең өчлегенә керә. Ул авыл хуҗалыгы үсешенең ТР икътисады һәм социаль сәясәтенең стратегик өстенлекләренең берсе булуын һәм киләчәктә дә шулай булачагын ассызыклады. Аграр секторга ярдәм итү өчен, республика бюджетыннан 10 процентка кадәр акча бүлеп бирелә.

“Без моның авылларыбызга нык булырга мөмкинлек бирүен күрәбез. Республика районнарында, шул исәптән, Саба районында халык саны кимеми. Иң мөһим күрсәткечләрнең берсе – бүген Татарстан үзен туклану продуктлары белән тулысынча тәэмин итә диярлек”, - дип билгеләде ТР Хөкүмәте башлыгы.

ТР Хөкүмәте башлыгы Илдар Халиков сервис үзәгендә эшләргә теләүчеләргә уңышлар теләде.


ТР Саба муниципаль районы башлыгы Рәис Миңнеханов әйтүенчә, John Deere компаниясе үзен республикада инде яхшы яктан күрсәтергә өлгергән. “Әлеге эшкә безнең районны сайлавыгыз өчен, зур рәхмәт. John Deere тракторлары сыйфатлы эшли, әлеге башлангыч дәвам итсен иде, дип телисе килә”, - диде ул.

TerraPro генераль директоры Майкл Сноу кунаклар белән татарча исәнләште. Ул компания турында, аның бурычлары һәм киләчәктәге үсеше хакында кыскача сөйләде.

Белешмә өчен:
John Deere маркалы техникага хезмәт күрсәтү буенча сервис үзәге Байлар Сабасы бистәсендә урнашкан. Комплексның гомуми мәйданы – якынча 1 га, шулардан 500 кв.м. сервис үзәгенең бинасы. Сервис үзәгендә 250кв. м. запас частьлар склады, 4 эш урыныннан торган ремонт зонасы, офис бүлмәләре, укыту классы, санузел һәм сервис хезмәткәрләре өчен ял бүлмәсе бар.