Илдар Халиков элемтәчеләрне Татарстанда телефон элемтәсе эшли башлауга 125 ел тулу белән котлады

Бүген республика элемтәчеләре - Элемтә хезмәткәрләре көнен, Татарстанда телефон элемтәсе эшли башлауга 125 ел тулуны һәм республиканың эре элемтә операторы “Таттелеком”ААҖ 15 еллыгын бәйрәм итте. Тармак хезмәткәрләрен бәйрәм белән котларга ТР Премьер министры Илдар Халиков килгән иде.

Тантана Татарстанда телефон элемтәсенә нигез салыну тарихын барлаудан башланды. Моннан 125 ел элек, 1888 елда, Казанда шәһәр хөкүмәт элемтә челтәре эшли башлый. Нәкъ менә шул вакытта берьюлы өч телефон станциясе сафка бастырыла.
Бүген билгеләп үтелгәнчә, республикада элемтә һәм мәгълүматлаштыру тармагы үсешенә “Таттелеком” компаниясе дә зур өлеш кертә. Предприятие 1998 елда ТР Элемтә министрлыгының структур бүлекчәсе булган “Казан халыкара телефон-телеграф станциясе” нигезендә төзелә. 2003 елда ул дәүләт унитар предприятиесеннән ачык акционерлык җәмгыяте итеп үзгәртелә.
Генераль директор Лотфулла Шәфигуллин предприятие ярдәмендә 2016 елга Татарстанда элемтә тармагы тагын да югары заманча үсеш дәрәҗәсенә чыгар, дигән өмет белдерә.

Премьер-министр Илдар Халиков бу һөнәргә үзенең дә күпмедер дәрәҗәдә катнашы бар дип саный. Моның сере бик гади – ул армия сафларында элемтәче булып хезмәт иткән икән. Хөкүмәт башлыгы республика җитәкчелеге исеменнән элемтәчеләрне, тармак ветераннарын һөнәри бәйрәмнәре белән котлады.
Премьер-министр компания хезмәткәрләренә, гомумән, элемтәчеләренә көндәлек тырыш хезмәтләре, кыю проектларны тормышка ашырулары, компаниянең стратегик үсеше белән бәйле амбицияле программасы өчен рәхмәт белдереп, тармак хезмәтчәннәре һәм ветераннарын, сәламәтлек, гаилә бәхете һәм уңышлар теләде.
Соңрак Илдар Халиков тармак ветераннарына, бертөркем хезмәткәрләргә ТР Дәүләт бүләкләрен тапшырды.

Үзенең котлау сүзләрен тантанада катнашкан ТР Премьер-министры урынбасары-мәгълүматлаштыру һәм элемтә министры Роман Шәйхетдинов та ирештерде.