Казанда Төркия компаниясе клиника ачарга планлаштыра

Казанда Төркиянең “Аджибадем” компаниясе шәхси медицина клиникасы ачарга мөмкин. Бүген ТР Хөкүмәт йортында узган очрашуда ТР Премьер-министры Илдар Халиков белән компания делегациясе бу проектны гамәлгә ашыру перспективалары буенча фикер алышты.

Acibadem медицина үзәкләре челтәре 1991 елдан бирле Төркия сәламәтлек саклау хезмәтләре өлкәсендә лидер. Ул югары сыйфатлы диагностика һәм уңайлы шартларда яңа медицина технологияләре белән дәвалау курслары тәкъдим итә.

Бүген ТР Премьер-министры Илдар Халиков белән компания делегациясе әгъзалары Казанда Аджибадем клиникасын ачу мөмкинлеге буенча фикер алыштылар. Татарстан Хөкүмәт җитәкчесе Төркия ягына клиника урыны һәм проект форматын билгеләүне сорап мөрәҗәгать итте. Илдар Халиков белдерүенчә, республика Төркия компаниясенә төрле вариантлар тәкъдим итәргә әзер. Мисал өчен, әзер күчемсез милек проекты, әзер медицина комплексының бер өлешен яки төзелеш өчен җир участогы.

“Безне бу проектны тизрәк гамәлгә ашыру кызыксындыра. Әгәр кирәк булса, анда республика эшмәкәрләре дә катнашырга әзер, - дип белдерде Илдар Халиков. – Безнең өчен “Аджибадем” кебек танылган компаниянең мөмкин кадәр тизрәк проектны гамәлгә ашыруга керешүе мөһим”.

Татарстан Премьер-министры сүзләренә караганда, ТР җитәкчелеге төзеләчәк клиника устав капиталына Татарстанның җир һәм милек белән керү, ә Төркия компаниясе мөстәкыйль рәвештә яки Татарстан партнерлары белән бергә клиникада хезмәт күрсәтү дәрәҗәсен югары стандартка җиткерү вариантына әзер. Республика клиникага билгеле дәүләт заказы гарантияли ала.

“Аджибадем” вәкилләре, компанияне Татарстан медицина хезмәтләре базары кызыксындыра дип ышандырдылар Илдар Халиковны. Ике яктан да катнашучылар проектның төгәл детальләрен берничә атна дәвамында билгеләргә килештеләр.