ЯҢАЛЫКЛАР
Татарстан Республикасында 2017 ел башланганнан бирле Дәүләт төзелеш күзәтчелеге инспекциясе һәм Татарстан Республикасы Дәүләт хезмәт инспекциясе тарафыннан 1 мең 79 тикшерү уздырылган. «Татарстан Республикасы төзүчеләре бергәлеге» үзлегеннән җайга салынучы оешмасы тарафыннан оешманың 907 әгъзасына тикшерү уздырылган.
Бүген бу хакта Татарстан Республикасы Хөкүмәте Йортында уздырылган республика киңәшмәсендә Татарстан Республикасы төзелеш, архитектура һәм ТКХ министры Ирек Фәйзуллин хәбәр итте.
Киңәшмәне барлык мунициципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда шулай ук Татарстан Республикасы Премьер-министры Алексей Песошин да катнашты.
Бүген Казанга ЮНЕСКО генераль директоры Ирина Бокова килде.
“Казан” халыкара аэропортында аны Татарстан Республикасы Дәүләт Киңәшчесе Минтимер Шәймиев каршы алды.
Бүген Татарстан Республикасы Президенты Рөстәм Миңнеханов Төркиядә Эгей ачык икътисадый зонасында булды.
Икътисадый зона директоры Шенай Сатоглу Рөстәм Миңнехановка территория буенча экскурсия уздырды.
Эгей ачык зонасы 1990 нчы елда ачылган, ул Төркиянең беренче сәнәгать зонасы һәм Измир провинциясенең Газиемир районында урнашкан, аның мәйданы - 2,2 млн. кв. метр тәшкил итә. Сәүдә күләме 2016 елда 4 млрд. доллар тәшкил иткән.
Төркиянең бөтен 18 ачык зонасы инвестицияләренең өчтән бер өлешен Эгей ачык зонасына юнәлдерә, һәм бүгенге көндә ул илнең иң эре зоналарының бересе. Территориядә бырлыгы 169 предприятие эшли, шуларның 100 - Төркия предприятиесе, 69 - чит илнеке. Аларда 19 мең кеше эш белән тәэмин ителгән, барысы да диярлек Төркия гражданнары.
Зонада электроника, автокомпонетлар, авиация сәнәгате, тукымалар, химия сәнәгате һәм башка өлкәләрдә эшләүче предприятиеләр урнашкан.
Эгей ачык зонасында җитештерелгән продукциянең өчтән бер өлеше Төркия ихтыяҗына бара, калганы экспортка юнәлдерелә. Төп партнерлары Европа иләре. Россия өлеше тышкы сәүдәдә зур түгел һәм бу юнәлештә Татарстан Президенты Рөстәм Миңнеханов зур мөмкинлекләр күрде.
Рөстәм Миңнеханов ТР сәнәгать һәм икътисад министрлыклары, "Алабуга" МИЗга хезмәттәшлеккә мөмкинлекләрне өйрәнергә йөкләде.
Бүген Төркия Республикасына эш сәфәре кысаларында Татарстан Республикасы Президенты Рөстәм Миңнеханов «SOCAR» компаниясенең «Star» нефть эшкәртү комлпексы төзелешендә булды. Әлеге проектны гамәлгә ашыру белән «Gemont» төзелеш компаниясе шөгыльләнә. Ул Түбән Камада да нефть эшкәртү комплексы төзелешендә катнаша.
Комплекс территориясендә Татарстан делегациясен «Star» нефть эшкәртү комплексы генераль директоры Месут Илтер һәм «Gemont» компаниясе идарәсе рәисе Садык Акман озата йөрделәр. Әлеге комплекс презентациясе тәкъдим ителде.
«SOCAR» компаниясе төзелешне 2011 елда башлаган, инвестицияләрнең гомуми күләме - 5,7 млрд. доллар, шулардан «SOCAR» өлеше - 3,7 млрд. доллар, калганы кредит акчалары. Хәзерге вакытта эшләр 92 процентка башкарылган. НЭЗ 2018 елда сафка кертү көтелә. Төзелеш мәйданында бер үк вакытта 17 мең хезмәткәр эшли.
Нефть эшкәртү комплексы елына 10 млн. тонна нефть эшкәртәчәк дип исәпләнә. Заводта Azeri Light, Kerkuk һәм Urals сортлары эшкәртеләчәк.
«SOCAR» (State Oil Company of Azerbaijan Republic) - Әзербайҗан Республикасының нефть компаниясе. Аңа 1992 елда нигез салынган һәм баш офисы Баку шәһәрендә урнашкан. Компания нефть эзләү, нефть ятмаларын эшкәртү, нефть продуктларын кулланучыга җиткерү, газ сату һәм башкалар белән шөгыльләнә.
Бүгенге көнгә компания Төркия икътисадына 12,6 млрд. доллар инвестицияләгән. 2016 елда ул Төркиянең иң эре чит ил инвесторы булган.
Бүген 86 нчы Измир халыкара күргәзмә-ярминкәсе кысаларында Россия Энергетика министры Александр Новак һәм Татарстан Республикасы Президенты Рөстәм Миңнеханов барында Россия һәм Төркия предприятиеләре арасында берничә килешүне имзалау тантанасы узды.
Бүген Татарстан Республикасы Президенты Рөстәм Миңнеханов Төркия Республикасына эш сәфәре кысаларында 86 нчы Измир халыкара күргәзмәсен ачу тантанасында катнашты.
Измир халыкара күргәзмәсе Төркиядә 1932 елдан бирле эшләп килә. Күргәзмәне оештыручылар – Төркиянең Тышкы икътисадый элемтәләр агентлыгы (DEIK), Төркия экспортерлары ассамблеясе (TIM) ярдәме белән, Төркия Икътисад министрлыгы җитәкчелегендә Измир мэриясе һәм «Измир ярминкәсе» (İZFAŞ) агентылыгы.
Бүген Татарстан Республикасы Президенты Рөстәм Миңнеханов Төркия Республикасына эш сәфәре кысаларында «Сәүдә-икътисадый өлкәдә Россия-Төркия партнерлыгының яңа этабы» Россия-Төркия эшлекле форумының пленар сессиясендә катнашты. Чыгышында ул хәбәр иткәнчә, 2017 елның октябрендә Татарстан Республикасында «Алабуга» МИЗ территориясендә Россия-Төркия Сәүдә-икътисадый хезмәттәшлеге буенча хөкүмәтара комиссиянең киләсе утырышы булачак.
Бүген Төркиягә эш сәфәре кысаларында Татарстан Республикасы Президенты Рөстәм Миңнеханов Төркия бизнес даирәләре вәкилләре белән берничә эшлекле очрашу уздырды, шулар арасында "Атлас Глобал" компаниясе вәкилләре дә бар иде.
Очрашуда "Атлас Глобал" компаниясе вәкиле Мурат Эрсой Татарстан Президенты белән туризм, транспорт һәм авиаэлемтә өлкәсендә хезмәттәшлек турында сөйләште.
"Бүген "Атлас Глобал" - Төркиянең яхшы хезмәт күрсәтүче һәм ышанычлы, чыннан да төрекчә кунакчыл алдынгы авиакомпанияләренең берсе", - дип билгеләде Рөстәм Миңнеханов. "Сез Россиядә бизнесыгызны уңышлы алып барасыз. Татарстанда Казаннан Антальягә, Бигеш аэропортыннан Стамбулга туры рейсларыгыз бар. Шул аэропорттан ерак түгел алдынгы икътисадый зоналарның берсе - "Алабуга", анда бүген күп санда Төркия компанияләре урнашкан. Күрше төбәкләр шулай ук Татарстан аэропортын кулланалар, бу әлеге рейсларның тулып йөрүенә ярдәм итә. Сезнең авиакомпания һәм безнең республика рейслар саны арту һәм илләребез арасында самолетта кешеләр йөртү санын арттыру яклы".
Мурат Эрсой ассызыклаганча, авиарейслар оештырудан ары компания тагын алдынгы туристик оператор һәм кунакханәләр хуҗасы да. Компания авиаэлемтә санын арттырырга тели, бигрәк тә Төркиягә килүче туристлар санын арттыру максатыннан: "Бүген туризм үсеше икътисадның 50 гә якын өлкәсенә этәргеч бирә. Без төрле Европа һәм Азия илләре белән дә хезмәттәшлекне үстерү өчен сөйләшүләр алып барабыз. Әлбәттә, Россия һәм Татарстан да безнең әһәмиятле стратегик хезмәттәшләребез. Без сезнең белән хезмәттәшлекне үстерергә телибез һәм инвестицион проектлар турында сөйләштергә әзер", - диде ул.
Бүген 86 нчы Измир халыкара сәүдә күргәзмә-ярминкәсе кысаларында Татарстан Республикасы Президенты Рөстәм Миңнеханов "ВМС" компаниясе идарәсе әгъзасы Тургут Шенол белән очрашты.
Рөстәм Миңнеханов искәрткәнчә, ул 2015 елда әлеге компаниядә булган һәм аның мөмкнилекләре уңай тәэсир калдырган. Ул билгеләгәнчә, Татарстан бүген актив рәвештә күләмле инфраструктура, сәнәгать һәм спорт проектларын гамәлгә ашыра. Республика - Россиянең алдынгы сәнәгать һәм авыл хуҗалыгы төбәге. Өченче ел рәттән Татарстан инвестицияклиматы илкүләм рейтингында беренче урында.
Бүген иртән Татарстан Республикасы Президенты Рөстәм Миңнеханов Россия-Төркия хөкүмәтара комиссиясенең рәистәшләре Россия Энергетика министры Александр Новак һәм Төркия икътисад министры Нихат Зәйбәкҗи оештырган эшлекле иртәнге ашта катнашты.
Очрашуда Төркия белән аткив рәвештә хезмәттәшлек итүче төбәк җитәкчесе буларак Рөстәм Миңнехановка сүз бирелде. Татарстан Президенты әлеге иртәнге ашта катнашу мөмкинлеге өчен рәхмәт җиткерде һәм кыскача Россия-Төркия мөнәсәбәтләре кысаларында Татарстан белән Төркия хезмәттәшеге турында хәбәр итте.
"Без хөрмәтле Төркия икътисад министры Зәйбәкҗи әфәнде белән берлектә Татарстанда Төркия заводларын ачтык. Бүген республикада алар инде унау. Бүгенге көнгә Төркия компанияләре республикабызга 2 млрд. доллар инвестицияләр кертте. Без энергетика, машина төзелеше, төзелеш, агач эшкәртү, сәламәтлек саклау, авыл хуҗалыгы һәм башка өлкәләрдә уңышлы хезмәттәшлек итәбез. Бүген без Төркиянең иң эре сәнәгать зоналарының берсе - "Гебзе" белән хезмәттәшлек итәбез, ул Свияжск мультимодаль комплексы һәс махсус икътисадый зона үсеше буенча оператор булырга әзер", - дип билгеләде Татарстан Президенты.
Шулай ук чыгышында билгеләгәнчә, "ТАИФ-НК" Татарстан компаниясе тирәнтен нефть эшкәртү буенча заводны ача, аның төзелешендә "Гемонт" Төркия компаниясе катнашты. Рөстәм Миңнеханов ассызыклаганча, Татарстан Төркия бизнесының алга таба да үз проектларын гамәлгә ашыруы яклы. Ахырда Татарстан Президенты Россиянең Измир халыкара күргәзмәсендә катнашуы алга таба илләр арасында эшлекле элемтәләр ныгуга һәм кидәюгә ярдәм итер, дип ышануын белдерде.