Универсиада лаләләрен Казан Кремлендә Балаларны яклау көнендә өләшәчәкләр

Татарстан Республикасында Балаларны яклау көнендә уздырылачак чаралар хакында бүген ТР Министрлар Кабинетында булган брифингта ТР яшьләр эшләре, спорт һәм туризм буенча министр урынбасары Рөстәм Гарифуллин һәм ТР фән һәм мәгариф министры урынбасары Светлана Гыйниятуллина сөйләделәр.

1 июнь – Халыкара балалар көненә Казан Кремленда ТР Балалар оешмалары советы активистлары Универсиада лаләләре өләшергә ниятләп тора. Болгарда исә “Балачак планетасы” исемле концерт программасы тәкъдим ителә, асфальтта рәсем ясау конкурсы уздырыла. Анда Болгар шәһәрлеге һәм Спас районы балалар бакчалары, ятим, караучысыз калган бала хәленә кереп үз канатына сыйдырган гаиләләр, физик мөмкинлекләре чикле балалар, мәктәп балалары чакырылган.

Казанның Дәрвишләр бистәсендәге инвалид балалар интернат-йортында “Тылсымлы сандык”/”Волшебный сундучок” дигән концерт-тамаша була. Аны әзерләүдә балаларга үз ирекләре, үз теләкләре белән яшьләр кушылган. Инвалид, коррекцион мәктәп балаларына ярдәм йөзеннән гамәлгә ашырыла торган “Добровольцы – детям” проекты кысаларындагы изге эшләрнең берсе менә шундый. Хәер, Бөгелмәнең муниципаль үзирекле үзәкләре исә 31 майда ук балалар хастаханәсендә һәм поликлиникасында “Бәхетле балачак” хәйрия акциясе уздыра.

Гомумән, республиканың 13 муниципаль берәмлегендә 3 меңгә якын баланы колачлаган 50 үсмерләр клубында 22 чара планлаштырылган. Балалар көне чаралары 19 шәһәр һәм райондагы барлыгы 6,4 меңләп малай һәм кызны берләштергән 133 клубта 148 ишегалды мәйданчыгында оештырылачак.

Балалар көнендә муниципалитет җитәкчеләре балалар иҗтимагый оешмалары активистлары, укуда, ярышларда, конкурсларда җиңү яулаганнар белән очрашачак, ди С.Гыйниятуллина. Бу очрашулар кысаларында грантлар, исемле стипендияләр, премияләр тапшыру да күздә тотыла.

Шулай ук 1 июньдә “IT-чемпион” республика конкурсының 1нче этабы буенча җиңүчеләрне бүләкләү булачак.