Татарстанда 2022 елга торак төзелеше программасы буенча 2 млн. 755 мең кв. метр торак төзелә
Татарстан Республикасында, Татарстан Республикасы Төзелеш, архитектура һәм ТКХ министрлыгы һәм Татарстан Республикасы Дәүләт торак фонды белән берлектә, 2022 елга торак төзелеше программасы формалаштырылган. Программа 18 гыйнварда расланган, аның күләме – 2 млн 755 мең кв. метр. Бүген бу хакта Татарстан Республикасы Хөкүмәте Йортында узган республика киңәшмәсендә Татарстан Республикасы төзелеш, архитектура һәм ТКХ министры Марат Айзатуллин хәбәр итте.
Киңәшмәне барлык мунициципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә Татарстан Премьер-министры Алексей Песошин да катнашты.
Татарстан Республикасы Төзелеш министрлыгы башлыгы хәбәр иткәнчә, социаль ипотека программасы буенча 72 йорт төзергә кирәк. Бүгенге көндә 33 мең кв. метрдан артык торак төзелгән инде – бу агымдагы елга планның 22%ын тәшкил итә.
Коммерциячел төзелеш линиясе буенча гомуми мәйданы 35,6 мең кв .м. булган 8 күп фатирлы йорт төзелгән һәм файдалануга тапшырылган, ягъни еллык план күрсәткечләренең 4%ы.
Шул ук вакытта министр билгеләп үткәнчә, гыйнвар ахырына республикада 69 мең кв. м торак тапшырылган, бу планның нибары 2,5%ын тәшкил итә. Ул муниципаль район башлыкларын торак төзелешен шәхси контрольгә алырга кушты.
Быел да – 2022 елда аерым категория гражданнарны торак белән тәэмин итү программалары гамәлгә ашырыла. 679 гаилә торак алучылар сыйфатында билгеләнгән. Иң күп категория – ятим балалар. 2022 ел исемлегенә шундый 600 кеше керә; ул быел ук торак алу хокукына ия булган ятим балалар арасыннан формалашачак.
«Биш һәм аннан да күбрәк бала тәрбияләүче күп балалы гаиләләр» категориясендә 22 торак алучы бар.
Тагын 50 торак алучы «яшь гаиләләр» категориясен тәшкил итә.
2022 елда мәҗбүри күченүчеләр, Ерак Төньяктан күчеп килүчеләр һәм чернобыльчеләр категориясенә 7 гаилә кертелгән.
Марат Айзатуллин социаль-мәдәни өлкә объектларын төзү һәм капиталь ремонтлау буенча республика программалары, шулай ук ТКХны модернизацияләү программалары турында сөйләде. Ул искәрткәнчә, программалар Татарстан Республикасы Хөкүмәте боерыклары белән раслана. Бүгенге көндә 4 программа буенча проектлар Татарстан Республикасы Министрлар Кабинетында, 2 программа буенча ТР Министрлар Кабинеты күрсәтмәләренең проектлары ведомствоара килешүдә, 3 программа эштә, 22 программа расланган.
Әйтик, быел күп фатирлы йортларны капиталь ремонтлау программасына гомуми мәйданы 4,7 млн кв. метр булган 769 күп фатирлы йорт кертелгән. Программаны финанслау күләме 6 миллиард 441 миллион сум тәшкил итә.
Муниципалитетлар тарафыннан аукцион лотларын формалаштыру өчен торак-коммуналь хуҗалык фондына документлар тапшыруның түбән динамикасы күзәтелә. 4 муниципаль берәмлектә урнашкан 177 күп фатирлы йортка документлар тапшырылмаган.
Республикада муниципаль районнарның автопаркын махсус коммуналь техника белән яңарту эше дәвам итә. Республикада бу эш 2017 елдан бирле системалы бара, дип искәртте ТР Төзелеш министрлыгы башлыгы. Беренче өч елда районнарга аренда килешүләре буенча гомуми бәясе 1 млрд. 517,2 млн. сум булган 360 берәмлек техника тапшырылган.
2021 елда 1 млрд. 125,4 млн. сумлык 155 махсус техника кайтартуга контрактлар төзелгән.
Бүгенге көндә районнарга 69 берәмлек тапшырылган. Калган техниканы киләсе өч ай эчендә график буенча китерү планлаштырыла.