Татарстан Республикасында торак фондының ягып җылыту сезонына хәзерлеге 80 процент тәшкил итә

Татарстан Республикасы торак фонды яңа 2008/2009 елның ягып җылыту сезонына 80 % ка әзер. Бу турыда бүген ягып җылыту сезонына хәзерлек һәм күпфатирлы торак йортларда капиталь ремонт үткәрү мәсьәләләре буенча Татарстан Республикасы Министрлар Кабинетында узган республика киңәшмәсендә Татарстан Республикасының төзелеш, архитектура һәм торак-коммуналь хуҗалык министры Марат Хөснуллин хәбәр итте.
Әлеге чара республиканың барлык муниципаль районнары катнашында видеоконференцэлемтә режимында узды. Киңәшмәне Татарстан Премьер-министры Рөстәм Миңнеханов алып барды.
“Ягып җылыту чорына әзерлек барышында “Татэнерго” ААҖ предприятиеләре тарафыннан 36 км җылыту челтәре, 12 казан агрегаты, 1 мең 347 км электр челтәре, 542 берәмлек электр җиһазлары ремонтланды һәм реконструкцияләнде”, - диде Марат Хөснуллин.
Аның сүзләренә караганда, республикада 29,3 км җылыту челтәре, 45 км су белән тәэмин итү һәм 6,3 км су тарату челтәре, 115 казан агрегаты, 1 мең 240 берәмлек өстәмә җиһаз ремонтланган һәм реконструкцияләнгән.
Татарстан Республикасы Төзелеш министрлыгы башлыгы техник документларны рәсмиләштерү эшенең бик әкрен баруын билгеләп үтте: пар казаннары бинасы булган 731 оешманың 16 сы гына хәзерлек паспортлары алган.
Торак фондының хәзерлеге республика буенча уртача 80,4 % тәшкил итсә дә, кайбер районнар ягып җылыту сезонына әлегә торакның (күп фатирлы йортлар) яртысыннан азрагын гына әзерләп җиткергән.
Торак йортларның җылылык белән тәэмин ителүен үзәкләштерелгән ягып җылытудан хосусыйга (2 контурлы казаннар урнаштыру) күчерүгә килгәндә, план буенча 2008 елда 440 торак йортта 5364 казан урнаштыру күздә тотыла. Бүгенгә 3340 казан монтажланган (ягъни планның 62,3 % ы үтәлгән), 834 казан (15,5 %) файдалануга тапшырылган.
“2 контурлы казаннарны монтажлау буенча барлык эшләрне ягып җылыту сезоны башланганчы төгәлләргә кирәк, - диде Марат Хөснетдинов. – Ни кызганыч, түбәндәге фактлар да саклануын билгеләп узарга кирәк: 2 контурлы казаннарны урнаштыру торак пунктларны җылылык белән тәэмин итүнең гамәлдәге схемалары белән һәрвакыт туры килеп бетми, ә бу гамәлдә булган пар казаннары биналары тарафыннан җылылык энергиясе чыгаруның үзкыйммәте артуга һәм, шуңа бәйле рәвештә, тариф үсүгә китерә”.
Татарстан Республикасы Төзелеш министрлыгы башлыгы муниципаль берәмлек җитәкчеләренә 2 контурлы казаннар урнаштыру программасын формалаштырганда, территорияләрнең җылылык белән тәэмин ителешен үстерүнең перспектив схемаларын исәпкә алып, максатчанлыктан чыгып эш итәргә кушты.
Ягып җылыту сезонына хәзерлек турында генераль директор урынбасары – “Татэнерго” ААҖ нең техник директоры Илгизәр Гайфуллин хәбәр итте.
Кулланылган энергия өчен түләүгә килгәндә, республикадагы кайбер муниципаль районнарның “Татэнерго” ААҖ нә бурычлары бар. Болар: Әлмәт, Яшел Үзән, Бөгелмә, Яр Чаллы районнары – 86 млн. сум чамасы.
Торак-коммуналь хуҗалык предприятиеләренең дә энергетикларга 172 млн. сум бурычы бар, шул исәптән Казан буенча – 100 млн. сум.