Рөстәм Миңнеханов ТРда Цифрлаштыру елына багышланган Татарстан Министрлар Кабинеты утырышында катнаша
Бүген Татарстан Республикасы Министрлар Кабинеты утырышында Татарстан Республикасы Президенты Рөстәм Миңнеханов катнаша. Утырыш Бәшир Рәмиев исемендәге (Казан) ИТ-парк мәйданчыгында уза һәм 2022 елда Татарстан Республикасында Цифрлаштыру елына йомгак ясауга һәм 2023 елга цифрлаштыру бурычларына багышланган.
Чара башланганчы Рөстәм Миңнеханов һәм аны озатып йөрүче затлар ИТ-паркта Бәшир Рәмиев музеенда булдылар. Моннан тыш, махсус күргәзмә дә оештырылган иде.
Исегезгә төшерәбез, чарада ТР Дәүләт Советы Рәисе Фәрит Мөхәммәтшин, Цифрлы үсешкә ярдәм итү ассоциациясе советы рәисе Рифкать Миңнеханов һәм башкалар катнаша. Утырыш шулай ук онлайн-интернетка трансляцияләнә, барлык муниципаль районнар да видеоконференцэлемтә буенча тоташтырылган.
Татарстан Республикасы Министрлар Кабинеты утырышын Татарстан Премьер-министры Алексей Песошин ачты. Ул республикада Цифрлаштыру елында тормышка ашырылган төп проектларны билгеләп үтте. Шулай ук Цифрлаштыру елына багышланган фильм да күрсәтелде.
Төп нотык белән Татарстан Республикасы Дәүләт идарәсен цифрлы үстерү, мәгълүмат технологияләре һәм элемтә министры Айрат Хәйруллин чыгыш ясады. Ул, аерым алганда, хәбәр иткәнчә, Татарстанның ИТ-тармагының 2022 елда продукция сатудан кергән кереме 30%ка – 2021 ел белән чагыштырганда 116 млрд сумнан 150 млрд сумга кадәр арткан. «Кертүләрне чикләү һәм IT ихтыяҗы арту шартларында эчке җиһазлар һәм программа тәэминаты сату артты. Оешмаларның тулаем кереме буенча фараз 150 млрд. сум тәшкил итә», - дип хәбәр итте ул.
Иннополис шәһәрен үстерү һәм анда тормышка ашырыла торган ИТ-проектлар турындагы нотык белән Татарстан Республикасы Премьер-министры урынбасары Роман Шәйхетдинов чыгыш ясады («Иннополис – Россиянең технологик бәйсезлеген тәэмин итү буенча үсеш ноктасы» нотыгы). Ул искәрткәнчә, бүген Иннополиста 547 компания эшли.
Мөһим бурыч - илебезнең технологик бәйсезлеген тәэмин итү, дип ассызыклады Роман Шәйхетдинов. Ул шулай ук хәбәр иткәнчә, бүген Көнбатыш эшләнмәләрен алмаштыру мөмкинлеге бирә торган үзебезнең программа продуктларын эшләү бара. «Иннополис үзен яңа ИТ-продуктларны сынау өчен нәтиҗәле мәйданчык итеп күрсәтте»,-диде ТР вице-премьеры.
Республикада цифрлы технологияләрне кертү турындагы нотык белән Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җаббаров чыгыш ясады.
Нурлат муниципаль районында цифрлаштыру тәҗрибәсе белән Нурлат районы башлыгы А. С. Әхмәтшин уртаклашты. «Халык заманча электрон хезмәтләрдән файдалана ала, - диде ул. - Хезмәтләр алу вакыты кыскарды, шул исәптән бала туу турында таныклык алу, индивидуаль торак төзелешенең башлануы һәм тәмамлануы турында хәбәр итү. Алга таба бердәм санлы платформага күчү булачак».
Нурлат районы башлыгы шулай ук өлкән буынны коммуналь хезмәтләр өчен электрон рәвештә түләргә өйрәтү баруын хәбәр итте. Нурлат шәһәрендә шулай ук 212 видеокамера урнаштырылган, бу гражданнарның иминлеген тәэмин итәргә мөмкинлек бирәчәк.