Татарстан Хөкүмәте башлыгы Рөстәм Миңнеханов укытучыларны һөнәри бәйрәмнәре белән котлады

Заман укытучысы – Татарстан Республикасы интеллектуаль потенциалының нигезе. Бу турыда бүген Укытучылар көнен бәйрәм итүдә Татарстан Премьер-министры Рөстәм Миңнеханов әйтте.
Чара “Корстон” мәдәни-күңел ачу үзәгендә (Казан) узды, һәм аңа республиканың иң яхшы укытучылары чакырылган иде.
“Укытучы һәр кешегә “тормышка юллама” бирә, - диде Татарстан Республикасы Хөкүмәте башлыгы, - һәм укытучының җаваплылыгы бик зур. Бу - авыр һәм һәрвакытта да тиешенчә бәяләнеп җитми торган хезмәт”.
“Сез һәрвакыт безнең эшләребездә һәм реформаларда таяныч булдыгыз, - диде Рөстәм Миңнеханов, укытучыларга мөрәҗәгать итеп. – Сез республикабызның уңышын һәм интеллектын формалаштырасыз. Нәтиҗәләр һәм перспективалар начар түгел”.
Татарстан Республикасы Премьер-министры республика җитәкчелеге исеменнән укытучыларга җиңел булмаган хезмәтләре өчен рәхмәт белдерде.
Татарстан Республикасы Хөкүмәте башлыгы шулай ук Татарстан укытучыларының кайберләренә грамоталар һәм “Татарстан Республикасының атказанган укытучысы” исемен бирде.
Шуны да искәртик: бүгенге көндә Татарстанда 40 меңнән артык укытучы исәпләнә. Шуларның якынча 2 меңе тәрбиячеләр белән коррекция мәктәпләрендә эшли, 300 гә якыны – кичке мәктәпләрдә.
Гомуми белем бирү учреждениеләрендә пенсия яшендәге 3,7 меңнән артык укытучы эшләвен дәвам итә. Республикада, гомумән Россиядәге кебек үк, мәктәпләрдә яшь укытучылар саны кимү тенденциясе күзәтелә. 2005 елда республиканың мәгариф системасында 6 меңгә якын яшь укытучы (укытучылар гомуми санының 12,8 % ы) эшләсә, 2007 елга инде 4,2 мең кеше генә (гомуми санның 10 % ы) кала.
2008 елның маена булган мәгълүматларга караганда, Татарстан башкаласында математика, физика, биология укытучыларына сорау зур.