Татарстанның Саба районында яңа агач эшкәртү комплексы ачылды

Бүген Татарстанның Саба районында түбән сортлы агач эшкәртү буенча яңа комплекс ачылды. Ачылыш тантанасында ТР Премьер-министры Илдар Халиков, РФ табигый байлыклар һәм экология министры урынбасары – Урман хуҗалыгының федераль агентлык җитәкчесе Владимир Лебедев, ТР урман хуҗалыгы министры Наил Мәһдиев, Саба муниципаль районы башлыгы Рәис Миңнеханов катнашты.

Саба районының Урман хуҗалыгы поселогында кунаклар урман селекция-орлыкчылык үзәгендә булдылар, монда алар республиканың урман тармагына багышланган экспозиция карадылар, үзәкнең эше белән таныштылар. Аннан соң, Илдар Халиков белән Владимир Лебедев РФ һәм ТРның атказанган урманчысы Нургали Миңнеханов һәйкәленә чәчәкләр салдылар, шулай ук Урман хуҗалыгы музеенда булдылар.

Татарстан Премьер-министры Илдар Халиков сәламләү сүзе белән чыгыш ясап, барысын да Республика көне белән котлады. “Без күптән көткән мондый уникаль заводның бәйрәм көнендә ачылуы символик төс ала. Татарстанның беренче Президенты Минтимер Шәймиев тә мондый комплексның кирәклеген берничә тапкыр әйткән иде, Республиканың хәзерге Президенты Рөстәм Миңнехановның да хыялы шушындый комплекс булдыру иде”,-дип белдерде Илдар Халиков.

Владимир Лебедев та завод ачылышы тантанасына килүчеләрне бәйрәм белән котлады.
“ Иң мөһиме, бу заводның кулланыш ассортиментында яфраклы йомшак агач төрләренең булуы. Без бүгенге көндә мондый агач төрләрен файдалануга юнәлтелгән барлык заводларга ярдәм итәбез”,-диде Владимир Лебедев.

Ачылыш тантанасында катнашучы кунаклар символик тасманы кискәннән соң, яңа заводны карадылар. Билгеләп үтәргә кирәк, төрле төрдәге товар продукциясен сатудан кергән еллык сумма 535,7 млн. сум тәшкил итәчәк.

Агач эшкәртү комплексының агачка булган гомуми ихтыяҗы – 141 мең куб.м.
Проектны гамәлгә кертүне инвестицияләүнең гомуми суммасы 741 млн.сум.
Проектны гамәлгә кертү нәтиҗәсендә агач эшкәртү комплексында 200дән артык яңа эш урыны булдырылган.