Таможня мәгълүмати-техник хезмәтенең Бөтенроссия семинар-киңәшмәсе Казанда уза

Бүген Казанда РФ төбәкләре таможня идарәләре, Россиянең таможня федераль хезмәтенә турыдан-туры буйсынган мәгълүмати-техник хезмәтләре башлыклары семинар-киңәшмәгә җыелды. Анда Татарстан Республикасы Премьер-министры Илдар Халиков, Россия таможня федераль хезмәтенең мәгълүмати технологияләр баш идарәсе җитәкчесе Алексей Шашаев, Идел буе таможня идарәсе башлыгы Сергей Рыбкин һәм Татарстан таможня башлыгы Альберт Мавликов катнашты.

Татарстан IT-технологияләр өлкәсендә Россия Федерациясе буенча иң алдынгылардан, бу семинар-киңәшмәнең аның башкаласы Казанда үткәрелүе шуның белән аңлатыла, дип белдерде әлеге чара башланыр алдыннан журналистлар белән очрашкан Россиянең таможня федераль хезмәтенең мәгълүмати технологияләр баш идарәсе җитәкчесе Алексей Шашаев.

Татарстан Республикасы Президенты Рөстәм Миңнеханов һәм үзе исеменнән сәламләп, ТР Премьер-министры Илдар Халиков, семинар-киңәшмәнең эш һәм мәдәни программалары нәтиҗәле булсын, дип теләде. Универсиада чорында 170 илдән килгән 12 меңнән артык спортчыны нибары 3 тәүлек тирәсе вакыт эчендә Казанда таможня контроле процедуралары уздырып үткәрү – гаять зур хезмәт. Татарстан таможнясы кунакчыллыгы таможня тикшерүе узган һәркемнең хәтерендә матур хатирәләр буларак теркәлгәндер, дип таможнячыларга И.Халиков оператив хезмәтләре өчен рәхмәт белдерде.

Татарстанда барлык документ әйләнешенең 90 проценты электрон юл белән башкарыла һәм түрәләр өстәле тулы кәгазь – республиканың төрле даирә хакимиятендә, учреждениеләрендә сирәк күренеш, дип, ТР Хөкүмәте башлыгы мәгълүмати технологияләрнең киң файдаланылышта булуы хакында мисаллар белән раслады. “Бу семинар үзара файдалы булсын дип телим. Меңьеллык Казанга рәхим итегез!” – диде И.Халиков.

Аннары сүз алган Идел буе таможня идарәсе башлыгы Сергей Рыбкин коллегаларын Идел буе федераль округы төбәге Татарстан башкаласы Казанда сәламләп, безнең хезмәтнең административ регламентын камилләштерүгә корылган семинар-киңәшмә уздыру мөмкинлеге биргән Татарстан Республикасы җитәкчелегенә рәхмәт белдерде.

Шул рәвешле, заманча таможня технологияләренә кагылышлы мәсьәләләр буенча уздырыла торган әлеге чара таможня контролен камилләштерүгә, таможня органнарының һәм тышкы икътисади эшчәнлектә катнашучыларның үзара багланышын нәтиҗәлерәк итүгә этәргеч булачак дип көтелә. Интернет-декларацияләү, алдан мәгълүматлашу, товарлар һәм транспорт чараларын ерактан торып читкә чыгару кебек таможня технологиясе коррупция, “кеше факторы” кебек нәрсәләрне минимальләштерә, бюрократик киртәләрне киметә һәм таможня хезмәтенә мобиль һәм нәтиҗәлерәк булырга ярдәм итә, ди Россиянең таможня федераль хезмәтенең мәгълүмати технологияләр Баш идарәсе җитәкчесе А.Шашаев.

2014 елдан электрон юл белән декларация тапшыруга күчү закон ягыннан декларация тапшыруның бердәнбер юлы буларак ныгытыла. Дөрес, РФ Хөкүмәте билгеләгән аерым очраклар бу мәсьәләдә искәрмә була ала. Семинар-киңәшмәдә әйтелгәнчә, хәзерге вакытта декларацияләү электрон юл белән 95 процент башкарыла, Идел буе федераль округы буенча - 98 процент. Таможняның мәгълүмати-технологик хезмәтләре алдында киләчәктә элемтә каналларының үткәрү мөмкинлекләрен арттыру, ышанычлылыгын ныгыту, телекоммуникацион җиһазларны резервка алу, шуларның нәтиҗәсе буларак, электрон декларацияләүне тизләтү бурычы тора. Алга таба электрон системаларның өзеклекләрсез эшләве, мәгълүмат базасына куркынычсызлык системасын “ватып” керүләргә, белешмәләрне юк иттермәс һәм мәгълүмати системаны бетерүгә юл куймас өчен чаралар күрелүе һ.б. турында сүз бара, хәер, ул туктаусыз процесс, диелде.

Яңалыкларның берсе буларак Идел буе төбәгендә мәгълүмати системалар эшендә штаттан тыш хәлләр (нештатные ситуации – НШС) белән идарә итүдә автоматлаштырылган системаның программа чарасын гамәлгә кертү аталды. Әлеге система штаттан тыш хәлләр бетерү процессын контрольдә тотарга ярдәм итә, андый хәлләрнең вакытын кыскарта, дип аңлатты белгечләр.