Татарстан Премьер-министры Рөстәм Миңнеханов, бөтендөнья банк системасындагы кризисны исәпкә алып, торак төзү һәм тапшыру программасына төзәтмәләр кертергә тәкъдим итте

Сентябрьдә Татарстан Республикасында 203 мең кв. метр торак сафка баскан. Бу турыда бүген Татарстан Республикасы Министрлар Кабинетында узган киңәшмәдә республиканың Төзелеш министрлыгы башлыгы Марат Хөснуллин хәбәр итте. Киңәшмә Татарстан Республикасы Премьер-министры Рөстәм Миңнеханов катнашында видеоконференция режимында узды.
1 нче октябрьгә республикада барлыгы 1 млн. 654 мең кв. метр торак тапшырылган, шул исәптән күпкатлы торак – 828 мең кв. метр, халыкның үз акчасына һәм бурычка алынган акчасына төзелгән азкатлы индивидуаль торак – 825 мең кв. метр. Еллык йөкләмә 76,4 % ка үтәлгән.
Киңәшмә башында Рөстәм Миңнеханов, тотрыксыз икътисади хәл һәм банк системасындагы кризиска бәйле рәвештә, индивидуаль торак төзүгә өстенлек бирергә кирәклеген әйтте. “Әгәр элек без, нигездә, бурычка алына торган капиталга ориентлашсак, бүген банк кризисы шартларында халыкның түләүләренә һәм үз акчабызга гына ышанырга мөмкин, - дип билгеләп үтте Татарстан Республикасы Премьер-министры. Ул шулай ук, дөнья икътисадындагы үзгәрешләр һәм гражданнарның сатып алу сәләте кимүне исәпкә алып, торак төзү буенча өчьеллык программага төзәтмәләр кертергә тәкъдим итте.
Рөстәм Миңнеханов, Татарстанда социаль ипотеканы алга таба үстерү өчен, шартлар булдырырга кирәк дип саный. Шуның белән бергә Татарстан Республикасы Хөкүмәте башлыгы “безнең теләкләребез финанс ресурсларыбыз белән үзара үлчәнештә каралырга тиеш”леген билгеләп үтте. Алдан исәпләүләр буенча, 2008 елда торак тапшыру планын республика үтәп чыга алачак. Ләкин киләсе елга, Татарстан Республикасы Премьер-министры уйлаганча, республика, ихтимал, үз өстенә төзелеш күләмен 10 % ка арттыру (элек планлаштырылганча) буенча йөкләмә алмас. Рөстәм Миңнеханов сүзләренә караганда, Татарстан Президенты Минтимер Шәймиев белән әлеге хәл турында җентекле фикер алышудан соң, бу турыда төгәлрәк әйтергә мөмкин булачак.
Агымдагы хәл турындагы доклад белән Татарстан Республикасының төзелеш, архитектура һәм торак-коммуналь хуҗалык министры Марат Хөснуллин чыгыш ясады. Ул сентябрьдә сафка бастырылган 203 мең кв. метр торакның 108,8 мең кв. метры – Казанга, 11,4 мең кв. метры – Яшел Үзән районына, 6,3 мең кв. метры Бөгелмә һәм башка районнарга туры килүен әйтте.
Марат Хөснуллин Татарстан Республикасы Президенты каршындагы Дәүләт торак фонды хисабы буенча (1 нче октябрьгә) 2381 фатирлык 171,7 мең кв. метр торак (ягъни расланган планның 24,2 % ы) тапшырылуын хәбәр итте. Шул исәптән августта 22,8 мең кв. метр (планның 3,2 % ы) тапшырылган, ягъни дәүләт программасы буенча торак тапшыру темплары әлегә кадәр түбән булып кала бирә.
Татарстан Республикасы Төзелеш министрлыгы башлыгы сүзләренә караганда, ел ахырына кадәр республикага коммерцияле шартларда тагын 511 мең кв. метр торак, Дәүләт торак фонды планы буенча 537 мең кв. метр торак тапшырырга кирәк.
Киңәшмәдә катнашучылар шулай ук 2009 елда торак төзү перспективалары, аерым алганда, республикада әзерлек дәрәҗәсе югары булган йортлар буенча башлап куелган эш турында фикер алыштылар.