Казанда Россия Тикшерү комитеты рәисе Кубогына дзюдо буенча турнир уза

Бүген Казанда Гимнастика үзәгендә Россия Тикшерү комитеты рәисе Кубогына дзюдо буенча II бөтенроссия яшүсмерләр турниры ачылды. Ул Батырлык ордены (үлгәннән соң бирелгән) яшь кавалерлары – Ногинскида яшәгән Женя Табаков һәм Яр Чаллыда яшәгән Данил Садыйков һәм хезмәт бурычын үтәгәндә һәлак булган тикшерү комитеты хезмәткәрләре истәлегенә багышланган. Ачылу тантанасында Татарстан Премьер-министры Илдар Халиков һәм Россия Тикшерү Комитеты рәисенең өлкән ярдәмчесе Игорь Комиссаров катнашты.

Россия Тикшерү комитеты рәисе исеменнән турнирда катнашучыларны Россия ТК рәисенең өлкән ярдәмчесе Игорь Комиссаров сәламләде. Аның сүзләренә караганда, Россия Тикшерү комитеты җитәкчелеге әлеге турнирның дәвамлы булып, Казанда – Универсиаданы кабул иткән шәһәрдә үткәрелүеннән бик канәгать.
“Бүгенге чара гражданлык патриотизмының зур эмоциональ тәэсиренә ия. Бүгенге буынның үз геройлары белән горурлануы куанычлы. Женя Табаков һәм Данил Садыйков батырлыклары, хезмәт вазифасын үтәгәндә вафат булган Россия ТК хезмәткәрләре каһарманлыклары белән янәшә тора. Безнең музейда бу малайларның портретлары тора. Алар безнең геройларның портретлары белән янәшә урнаштырылган. Кызганычка каршы, без үз хезмәткәрләребез арасында югалтуларга дучар булабыз, бу тыныч вакытта Тикшерү комитетының җинаятьчелеккә каршы көрәш алып баруы белән бәйле. Бу турнир аша без коллегаларыбызга һәм батырлык орденының ике яшь кавалерына дан җырлыйбыз”, - дип белдерде Игорь Комиссаров һәм мәрхүмнәрне бер минут тынлык белән искә алуны сорады.

Аннан соң Россия Тикшерү комитеты рәисенең өлкән ярдәмчесе бүләкләр тапшырды.“Теләктәшлек өчен” медале белән ТР Премьер-министры Илдар Халиков һәм 8 яшьлек Чаллы кызы Василиса Галицынаны үтерүчене эзләргә ярдәм итүне оештырган “Василиса” волонтерлык оешмасы лидеры Вера Русина бүләкләнде.

ТР Хөкүмәте Рәисе ТР Президенты һәм шәхсән үз исеменнән сүз алып барды. “Казанның шушы турнирны үткәрү урыны буларак сайлануы күңелгә бик хуш килә. Биредә батырлык һәм спорт, истәлек һәм җиңү көне бергә үрелгән”, - диде ул һәм ярышларда катнашучыларга бөтен сәләтләрен күрсәтүләрен теләде.
Турнирда катнашучыларга гадел көрәшне һәм матур очрашуларны шулай ук РФ президентының ИФО дагы тулы вәкаләтле вәкиле ярдәмчесе Юрий Золотарев, РФ Оборона министры урынбасары Олег Остапенко һәм Россия космонавты Федор Юрчихин теләде. Соңгысыннан орбита космик станциясеннән видеомөрәҗәгать булды.
Рәсми сәламләүләрдән соң РФ һәм ТР гимннары яңгырады.

Турнирның хөрмәтле кунаклары арасында – тикшерү органнары ветераннары һәм хезмәт бурычын үтәгәндә вафат булган Россия Тикшерү комитеты хезмәткәрләре туганнары, апасын коралланган җинаятьчедән яклаганда фаҗигале төстә һәлак булган Женя Табаков һәм 2012 нче елның маенда 9 яшьлек малайны коткарганда үз гомерен корбан иткән Данил Садыйков туганнары.

Ярышларда Россиянең 14 төбәгеннән 15-17 яшьтәге 130 спортчы катнаша. Татарстанны ике команда тәкъдим итә.
Җиңүчеләрне һәм призерларны бүләкләү һәм ярышларны ябу тантаналары бүген кичен булачак.