Беларусь Республикасының Россиядәге Илчесе Дмитрий Крутой Иннополиста булды
Беларусь Республикасының Россия Федерациясендәге Гадәттән тыш һәм Тулы вәкаләтле Илчесе Дмитрий Крутой Иннополиста булды. Татарстан Республикасы Премьер-министры урынбасары Роман Шәйхетдинов озатуында ул ИТ-шәһәрнең һәм «Иннополис» махсус икътисадый зонасының берничә инфраструктур объектында булды.
Алар арасында - Иннополис Университетының робототехника һәм мехатроника компонентлары технологияләре үзәге, аның составына робототехника үзәге, пилотсыз технологияләр үзәге, ясалма интеллект лабораториясе, Электроника һәм микроэлектроника дизайн-үзәге һәм озата бару һәм үсеш секторы. Үзәкнең бурычлары - индустриаль партнерлар өчен фәнни сыешлы робототехника продуктлары һәм хезмәт күрсәтүләрен, шулай ук яңа белем бирү программаларын эшләү.
Шулай ук кунак А.С. Попов исемендәге технопаркта һәм югары технологияләр өлкәсендә яңа технопарк "ИнноПарк"та булды, аның мәйданы 12 мең кв. м. артык, узган елның декабрендә эшли башлаган. Биредә робототехника, электроника, пилотсыз очу аппаратлары өлкәсендә проектлар актив үсеш ала. Исегезгә төшерәбез, Россия Федерациясе Сәнәгать һәм сәүдә министрлыгы «ИнноПарк»ны дәүләт ярдәме чараларыннан файдалана алырлык югары технологияләр өлкәсендәге Россия технопарклары реестрына кертте.
Дмитрий Крутой Белоруссиянең Иннополис предприятиеләре белән хезмәттәшлек потенциалын югары бәяләде: «Иннополис резидентларының югары технологияле компетенцияләрен безнең МАЗ, МТЗ, БЕЛАЗ сәнәгать гигантлары эшенә кертү перспективаларын күрәбез. Шулай ук Иннополисның Белоруссия югары технологияләр паркы һәм академик структуралар белән ИТ-тармакның иң кирәкле сегментларында: пилотсыз технологияләрдә, компьютер күрүендә, «цифрлы дубликатлар» булдыруда хезмәттәшлегеннән югары нәтиҗә көтәбез.