Рөстәм Миңнеханов: Дөньяның алдынгы державалары белемнәрен үзара файдалы интеграцияләү һәркем өчен ачык һәм мөмкин хәзер

Без мәгълүмат һәм интеллектуаль технологияләр гөрләп үскән, көндәлек тормышка наноматериаллар һәм югары технологияле полимерлар үтеп кергән бер заманда яшибез, һәм белемнәрнең бердәм платформасын барлыкка китерү һәм тәҗрибә алмашу үсешнең төп бурычы булып тора.

Бүген бу хакта Татарстан Республикасы Президенты Рөстәм Миңнеханов Russian Innovation Week (RIW, “Россия Инновацион атнасы”ның) икенче мәртәбә еллык конференциясен ачу тантанасында хәбәр итте.

Russian Innovation Week форумы Бостон шәһәрендә (Массачусетс штаты, АКШ) уза. Чараның төп максаты - Россия инновацион индустриясенең куәтен тәкъдир итү, Россия инвесторларына һәм венчур фондларына Америка партнерлары белән элемтәләр урнаштыруда, ә Россия технологик компанияләренә – капитал чыганакларына керә алу мөмкинлеген алуда ярдәм итү.

“Россия Инновацион атнасы”нда Россия һәм АКШ дәүләт хакимияте органнары вәкилләре, технологияләр өлкәсендә эре бизнес җитәкчеләре, венчур инвесторлары һәм эшкурлар катнашты. Форумны оештыручылар – “РВК” ААҖ, “РОСНАНО” ААҖ һәм “Сколково” фонды.

Форум программасында – Россия өчен актуаль мәсьәләләр: интеллектуаль милекне хокукый яктан тәэмин итү, инновацион инфраструктура булдыру, энергетика, биотехнология, IT, робототехника, телекоммуникацияләр юнәлешләре һәм башкалар буенча фикер алыштылар.

“Россия Инновацион атнасы”нда катнашучыларны сәламләп, Рөстәм Миңнеханов хәбәр иткәнчә, бүген АКШның иң алдынгы һәм уңышлы регионнарыннан берсенең тәҗрибәсен өйрәнү мөмкинлеге туды.

“Массачусетс – икътисадый үсешнең югары дәрәҗәсенә ирешкән штат, ул фән һәм инновацияләр өлкәсендә әйдәп баручы булып тора, - диде Рөстәм Миңнеханов. - Юкка гына форум өчен Бостон сайлап алынган. Монда күп санлы фәнни-тикшеренү үзәкләре һәм институтлары, атаклы югары уку йортлары - Гарвард университеты һәм Массачусетс технологик университеты урнашкан. Массачусетс штаты шуңа бәйле рәвештә һәм башкалар нәтиҗәсендә илнең һәм дөньяның алдынгы регионнарының берсе исемен горур рәвештә йөртә”.

Татарстан Президенты билгеләп үткәнчә, бүген Россиядә икътисадны модернизацияләүгә, инновацияләрне төрле тармакларга кертүгә зур игътибар бирелә. Аның сүзләренчә, дәүләтнең инновацион икътисадын булдыру регионнарның актив катнашуыннан башка мөмкин түгел.

“Бүген бу форумга Россия инновацион регионнары ассоциациясе исеменнән килдем , - диде Рөстәм Миңнеханов. - Ассоциация 2010 елда регионнарның инновацияләрне һәм алдынгы тәҗрибәне алга сөрү өчен төзелде. Хәзерге вакытта РИРАнә 15 регион керә – алар Үзәк Россиядән, Идел буеннан һәм Себердән”.

Татарстан Башлыгы ассызыклаганча, 2012 һәм 2013 елларда РИРА инновацияләрне гамәлгә кертү буенча чит илләр партнерлары белән хезмәттәшлекне һәм инновацион мәйданчыкларның халыкара тәҗрибәсен өйрәнү эшен активлаштырды.

2013 елның апрелендә Амстердамда (Нидерланд Корольлеге) Россия инновацион регионнары ассоциациясе тарафыннан Россия-Нидерланд хезмәттәшлеге кысаларында кайбер документларга имза салынды.

2013 елның февралендә шулай ук Татарстан Республикасы (Россия Федерациясе) белән Прованс–Альп –Лазурный берег регионының Региональ советы (Франция Республикасы) арасында шулай ук хезмәттәшлек һәм Россия инновацион регионнары ассоциациясе белән Прованс–Альп –Лазурный берег регионы арасында партнерлык мөнәсәбәтләрен урнаштыру ниятләре турындагы документларга имза салынды.

Рөстәм Миңнеханов шулай ук искә төшергәнчә, хезмәттәшлек турындагы документларга Германиядәге партнерлар белән имза салынды.

“Бүген дөньяның алдынгы державалары белемнәрен үзара файдалы интеграцияләү һәркем өчен ачык һәм мөмкин. Бу, һичшиксез, тормыш дәрәҗәсен яхшыртырга һәм икътисадны үстерергә ярдәм итәчәк, - диде Татарстан Президенты, Россия инновацион регионнары ассоциациясе рәисе Рөстәм Миңнеханов. – Без озак сроклы һәм нәтиҗәле хезмәттәшлеккә әзер. “Россия Инновацион атнасы” барышында Татарстан делегациясе әгъзалары үз коллегалары белән хезмәттәшлекнең төрле рәвешләре һәм уртак проектлар турында фикер алышачаклар. Ышанам ки, Бостондагы очрашулар нәтиҗәләре Россия белән АКШ арасындагы мөнәсәбәтләр үсешенә лаеклы өлеш кертәчәк. Форумда катнашучыларга һәм аның кунакларына уңышлы эшләр һәм инновацион идеяләр телим”.