Татарстанда 210 балалар бакчасында җылылык юк

Бүгенге көннең төп бурычы – җылылык җибәрү. Бүген ТР Хөкүмәт йортында видеоконференция режимында узган атналык республикакүләм киңәшмәдә Татарстан Премьер-министры Илдар Халиков шундый бурыч куйды. Ул социаль учреждениеләргә җылылык бирү вәзгыятен катастрофик дәрәҗәдә дип атады.

“ТР Төзелеш, архитектура һәм торак-коммуналь хуҗалык министрлыгының җылылык җибәрү турындагы мәгълүматы һәр көнне минем өстәлдә булырга тиеш. Дүшәмбе иртән барлык мәктәпләрдә һәм балалар бакчаларында җылылык булу зарур. Барлык киңәшмәләрне кичектерегез һәм җылылык җибәрегез”, - дип йөкләде И.Халиков

Бүген балалар бакчаларының 88,4 процентында гына җылылык бар. Бүген республикада 210 балалар бакчасында җылылык юк. “Балалар бакчалары – бу иң борчыган тема. Әлбәттә, бу катастрофик сан”, - диде ТР Хөкүмәте җитәкчесе. Шулай ук Татарстанда 251 мәктәптә, 404 сәламәтлек саклау учреждениеләрендә һәм 604 мәдәният объектында да җылылык юк.

Шул ук вакытта И.Халиков социаль объектларга һәм торак фондка җылылык җибәргән районнарны да атады. Республиканың лидерлык итүче районнары арасында Актаныш, Апас, Әтнә, Алексеевски, Биектау, Чүпрәле, Кайбыч, Саба һәм Теләче районнары бар. Премьер-министр аларга билгеләнгән вакытта эшне башкарулары өчен рәхмәт белдерде.

“Вәзгыять коточкыч, урамда салкын, күп кенә учреждениеләрдә 15 градус җылыдан түбәнрәк температура. Хәзерге көнгә кадәр социаль объектларга җылылык бирмәгән район башлыклары белән очрашып сөйләшәчәкбез. Бүгенге көннең төп бурычы – җылылык җибәрү”, - дип белдерде И.Халиков.