Татарстан гражданнар оборонасы буенча бөтенсоюз өйрәнүләрендә катнашачак

2013 елның 1 октябре, сишәмбе
4 октябрь, җомга көнне, иртәнге 9да бөтен Татарстан муниципаль берәмлекләре буенча сирена кычкыртылачак, бу бөтен Россия буенча шулай һәм “Внимание, всем!” дигәнне аңлата.

Сирена ишетү белән, гражданнар радио, ТВ кебек мәгълүмат чыганакларын кабызырга, ТВның “Россия 1”, “ТНВ” каналларын карарга (алга таба Россия-2”, “Культура”, “Россия 24” каналларын да шуңа җәлеп итү буенча эш бара) яки “МТС”, “Мегафон” операторлары элемтә хезмәте күрсәтә торган кесә телефоннарына килгән СМС-хәбәр-күрсәтмәне карарга тиеш була.

Ул көнне “Нижнекамскшина” ААҖндә янгын сүндерү буенча тактик өйрәнүләр уздырыла һәм анда өстәмә көчләр җәлеп ителә. Гомумән, республикада гражданнар оборонасы чараларын тәэмин итүдә 14 хезмәт катнаша, төп эшләрне башкаруда гражданнар оборонасы көчләре 150 мең кешегә җыела, муниципалитетларда штаблар эшли. Ул көнне республикада хакимият һәм идарә органнарын хәбәрдар итү, төбәкнең үзәкләштереп сөрән салу системасын тикшерү, РФ Хөкүмәте вәкилләре җитәкчелегендә тиешле чаралар күрү, уку йортларында тормыш иминлеге дәресләре уздыру һ.б. чаралар планлаштырылган. Татарстанда өйрәнүләр белән ТР Хөкүмәте башлыгы җитәкчелек итәчәк.

Бүген ТР Хөкүмәте йортында барган брифингта Россия Гадәттән тыш хәлләр министрлыгының ТР буенча Баш идарәсе җитәкчесе урынбасары Андрей Орлов белән ТР буенча гражданнар оборонасы эшләре һәм гадәттән тыш хәлләр буенча министры урынбасары Олег Степущенко шундый аңлатма бирде.

А.Орлов сүзләренчә, бу өйрәнүләр гражданнар оборонасы идарәсендәгеләрнең һәм көчләренең гражданнар оборонасы буенча беренче чиратта башкарылырга тиешле эшләргә әзерлеген тикшереп-бәяләп карау, күптән түгел эшләнеп гамәлгә кертелгән халыкны саклап калу һәм гражданнар оборонасы планының чынлыкта кулланылыш нәтиҗәлелеген сынау өчен кирәк.

Нәтиҗәдә, дәүләт хакимиятенең барлык органнарының, җирле үзидарә органнарының, оешмаларның халыкны һәм территорияләрне табигый, техноген характердагы бәла-казалардан саклау, дошманның корал кулланудан соңгы нәтиҗәләрне бетерү мәсьләләрендә тәэмин ителеш ягыннан эшчәнлеген, оешканлыгын бәяләүдә нигез-дәлил булачак, диде Олег Степущенко.



ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International