Татарстанның беренче вице-премьеры Борис Павлов Мәскәүдә Халыкара фәнни-техник конференциядә катнашты

Бүген Татарстан Республикасы Премьер-министрының беренче урынбасары Борис Павлов В.А.Котельниковның тууына 100 ел тулуга багышланган Халыкара фәнни-техник конференциядә доклад белән чыгыш ясады.
Конференция Мәскәү энергетика институтының зур актлар залында узды.
Үзенең чыгышы башында Борис Павлов конференциядә катнашучыларны Татарстан Республикасы Премьер-министры Рөстәм Миңнеханов исеменнән истәлекле вакыйга белән тәбрик итте һәм Татарстанда яшәүчеләрнең үз ватандашы – радиотехника, электроника, радиоастрономия һәм мәгариф өлкәсендә илебез фәнен үстерүгә зур өлеш керткән Владимир Александрович Котельников белән горурлануларын билгеләп үтте.
Конференция эшендә Россия Федерациясе Дәүләт Думасы депутаты С.Е.Савицкий, “ОКБ МЭИ” федераль дәүләт унитар предприятиесе генераль директоры А.С.Чеботарев, Хәрби-диңгез флотының Элемтә идарәсе вице-адмиралы Ю.М.Кононов, Россия Федерациясенең Криптография академиясе вице-президенты В.Н.Сачков, Россия Фәннәр академиясе академиклары Ю.В.Гуляев, Б.Е.Черток, Ю.Н.Парийский, Н.С.Кардашов, Мәскәү энергетика институтының Радиоэлектроника институты директоры Н.Н.Удалов һәм башкалар катнашты.
Республиканың беренче вице-премьеры билгеләп үткәнчә, академик Котельниковның күпсанлы фәнни-тикшеренү эшләнмәләре республиканың сәнәгый предприятиеләрендә киң кулланылды, югары техник белемгә ия булган белгечләр әзерләү сыйфатын арттыруга һәм Татарстанның социаль-икътисади үсешенә ярдәм итте.
Борис Павлов сүзләренә караганда, Владимир Котельников фәндә һәм Татарстан Республикасының мәгариф өлкәсендә яңа юнәлешләрне хуплаган. Аның потенциаль тоткарлыкның тотрыклылыгы теориясе А.Н.Туполев исемендәге Казан дәүләт техника университетында (КАИ) бүген дә уңышлы үстерелә. В.А.Котельниковның КДТУга (КАИ) 1985 елдагы визиты әлеге теориянең формалашуы һәм үсеше өчен куәтле импульс булды. Аның нигезендә сигналларны полигаус модельләре базасында табу, формалаштыру һәм аерып чыгару теориясе үстерелә.
В.А.Котельников идеяләрен үстерүнең икенче мөһим юнәлеше – Казан дәүләт университетында метеор радиолокация һәм элемтә мәктәбен үстерү.
“Бүгенге көндә ике юнәлештәге тикшеренүләр нәтиҗәсендә ирешелгән уңышлар тәҗрибәдә, шул исәптән Татарстан Республикасында мобиль элемтә системаларын үстерү өчен дә, уңышлы тормышка ашырыла”, - диде беренче вице-премьер.
Чыгышының ахырында Борис Павлов конференциядә катнашучыларга нәтиҗәле эш, илебез фәнен һәм инновацияләрне үстерүдә зур иҗади уңышлар теләде.