Алексей Песошин Казанда БРИКС саммитына әзерлек буенча республика оештыру комитеты утырышында катнашты
Татарстан Рәисе Рөстәм Миңнеханов 2024 елда БРИКС берләшмәсендә Россия Федерациясе рәислеген әзерләү һәм тәэмин итү буенча республика оештыру комитеты утырышын уздырды. Чара ТР Хөкүмәте Йортында узды. Анда Татарстан Дәүләт Советы Рәисе Фәрит Мөхәммәтшин, Татарстан Премьер-министры Алексей Песошин, Казан мэры Илсур Метшин, республика министрлыклары һәм ведомстволары җитәкчеләре катнашты.
Рөстәм Миңнеханов билгеләп үткәнчә, БРИКС илләре саммитына әзерлек кысаларында Казанда федераль оештыру комитеты һәм федераль министрлыклар һәм ведомстволардан коллегалар белән тыгыз элемтәдә зур оештыру эше алып барыла.
Республикада әзерлекне, шул исәптән 14 эш төркеме эшчәнлеген җайга салуны вице-премьер - Татарстан Республикасы Министрлар Кабинеты Аппараты җитәкчесе Шамил Гаффаров җитәкчелегендәге оператив штаб гамәлгә ашыра. "Саммитка кадәр нибары ике ай ярым вакыт калып бара. Без әзерлек барышында финиш сызыгына чыктык. Барлык планлаштырылган чараларны да җайга салып һәм зур җаваплылык белән үтәргә кирәк. Төп бурыч - иминлекне тәэмин итү", - дип ассызыклады республика Рәисе. Искәртәбез, XVI БРИКС саммиты Казанда 2024 елның 22-24 октябрендә узачак. Рөстәм Миңнеханов ассызыклаганча, җәмәгать иминлеген тәэмин итү һәм шәһәр халкына уңайлы булсын өчен Россия Федерациясе Президенты Владимир Путин тарафыннан 22-24 октябрьне Казанда эш көне дип игълан итү карары кабул ителгән. Әлеге документ нигезендә Татарстан Рәисе Указы әзерләнгән. Премьер-министр урынбасары - Татарстан Республикасы Министрлар Кабинеты Аппараты җитәкчесе Шамил Гаффаров ассызыклаганча, Казанда эре халыкара чаралар үткәрүдә зур тәҗрибә бар. БРИКС саммитына әзерлек кысаларында шәһәр һәм транспорт инфраструктурасын әзерләү, юлларны һәм инженерлык челтәрләрен ремонтлау, шулай ук шәһәрне төзекләндерү буенча зур эш алып барыла. Куркынычсызлык һәм террорчылыкка каршы саклану чаралары сизелерлек көчәйтелгән. Казан мэры Илсур Метшин хәбәр иткәнчә, 18 юл участогында ремонт эшләре тәмамланган. Шәһәрнең төп урамнарын яшелләндерү кысаларында өстәмә рәвештә 300 агач һәм 5 мең куак утыртылган. Юлларның 14 участогында су белән тәээмин итү, су җибәрү, җылылык челтәрләре алыштырылган. Барлыгы 5,5 км челтәр реконструкцияләнгән. Алты җәмәгать киңлеген төзекләндерү төгәлләнгән: Меңьеллык паркы, фонтан комплексын алыштырып Болак суы, Бауман урамы, Казан Кремле диварлары янындагы Меңьеллык мәйданы, Котельников һәм Коротченко скверлары. Төзекләндерү эшләре ике объектта дәвам итә: Горький паркына керү төркемендә һәм «Казан» сәламләү стеласында. Шулай ук Казан Ратушасы бинасы да ремонтланган. Рөстәм Миңнеханов кунакчыллык инфраструктурасын әзерләүгә, шулай ук кунакханә персоналын укытуга һәм аларның квалификациясен күтәрүгә аерым игътибар бирергә кушты. Туризм буенча Татарстан Республикасы дәүләт комитеты рәисе Сергей Иванов хәбәр иткәнчә, бу максатлар өчен махсус семинар оештырылачак. Рөстәм Миңнеханов билгеләп үткәнчә, ике атнадан, 21 августта, Мәскәүдә федераль оештыру комитеты утырышы узачак, аның барышында республиканың әзерлегенә бәя биреләчәк.