2008-2009 уку елында чит илдә Татарстан икътисады өчен кадрлар әзерләү һәм яңадан әзерләү программасына республика бюджетыннан 150 млн. сум бүлеп бирелгән

2008-2009 уку елында республика икътисады өчен кадрлар әзерләү һәм яңадан әзерләүнең хөкүмәт программасы кысаларында Татарстан Республикасыннан 450 дән артык кеше Россия һәм чит ил югары уку йортларына укырга җибәрелде. Бу турыда бүген Татарстан Республикасы Министрлар Кабинетының традицион брифингында Татарстан Республикасының мәгариф һәм фән министры урынбасары Андрей Поминов хәбәр итте.
Уку өчен Татарстан Республикасы Хөкүмәте грантын алганнар арасында 90 кеше – Татарстан югары уку йортлары студентлары, 40 тан артык кеше – дәүләт һәм муниципаль учреждение белгечләре.
Быел программаны тормышка ашыру өчен республика бюджетыннан якынча 150 млн. сум бүлеп бирелгән (2007 елда – 103 млн. сум). Андрей Поминов сүзләренә караганда, чит илдә кадрлар әзерләү һәм яңадан әзерләү программасына 2008 елда башта 107 млн. сум бүлеп бирү күздә тотылган була, ләкин программаның юнәлешләре киңәйтелүгә бәйле рәвештә, финанслау да арттырылган.
Әйтик, студент, аспирант һәм яшь галимнәрдән, шулай ук профессор-укытучылар составы, дәүләт һәм муниципаль учреждениеләр белгечләреннән тыш, программа кысаларында чит тел укытучылары (нигездә, инглиз теле), “перспектив технологияләр буенча проект төркемнәре” һәм “физкультура, спорт һәм туристлык өлкәсендә югары квалификацияле белгечләр” категориясендәге белгечләр укытылачак (2013 ел Универсиадасына кадрлар әзерләү кысаларында).
Андрей Поминов журналистларга инде бу уку елында ук 11 кешенең нанотехнологияләр өлкәсендә укыр өчен чит илгә җибәрелүен хәбәр итте; Универсиада-2013 кә әзерләнү өчен, Лесгафт исемендәге Санкт-Петербург физкультура институтына 24 белгеч (тренерлар составы) җибәрелгән.
2013 елга кадәр чит илдә кадрлар әзерләү һәм яңадан әзерләү программасы кысаларында спорт өлкәсендә генә түгел, туристлык, сервис һ.б. өлкәләрдә дә белгечләр укыту күздә тотыла.
Чит илдә стажировка үткән грант алучылар укуны дәвам итү (нигезләү белән) - икенче елга калу хокукыннан да файдалана алган. Бу мөмкинлектән 30 дан артык кеше файдаланган.
“Программаны тормышка ашыру дәверендә (2006 елдан башлап) анда 900 дән артык кеше катнашты”, - дип хәбәр итте Татарстан Республикасының мәгариф һәм фән министры урынбасары.
2008 елның язында республикада “Алгарыш” программасын тәмамлаучылар ассоциациясе төзелде.
Журналистларга ассоциация президенты Алсу Газизова хәбәр иткәнчә, 2009 елда “Алгарыш”ны тәмамлаучылар форумын үткәрү күздә тотыла. Киләчәктә мондый форумнарны ел саен үткәрү планлаштырыла.
Чит илдә Татарстан Республикасы икътисады өчен кадрлар әзерләү һәм яңадан әзерләүнең республика программасы турында тулырак мәгълүматны интернетта табарга була (www.mon.tatar.ru , www.alga.tatar.ru).