“CGGC International” Кытай компаниясе Татарстан Республикасы территориясендә заказлар алу белән кызыксына

Бүген Татарстан Республикасы Премьер-министры Рөстәм Миңнеханов Татарстан Республикасы Министрлар Кабинетында Гарәп сәүдә үзәге җитәкчесе Азиф Аяз әфәнде (Кувейт) һәм “CGGC International” компаниясе (Кытай) вәкилләрен кабул итте.
Очрашуда шулай ук Татарстан Республикасының транспорт һәм юл хуҗалыгы министры Илдус Фәсхетдинов, Татарстан Республикасының төзелеш, архитектура һәм торак-коммуналь хуҗалык министры урынбасары Раузил Хаҗиев, “Связьинвестнефтехим” ААҖ нең генераль директоры Валерий Сорокин һ.б. катнашты.
Очрашу барышында “CGGC International” (China Gezhouba (Group) Corporation) ның вице-президенты Татарстан Хөкүмәте башлыгы өчен Кытайның бу зур төзелеш компаниясе мөмкинлекләрен тәкъдир итте.
“CGGC International профиле” – гидроэлектростанцияләр, электр тапшыру линияләре, күперләр һәм төрле биеклектәге юл тармаклары, торак кварталлар төзү. Компания Кытайның хөкүмәт протекциясен ала торган (шул исәптән халыкара базарларда проектларны тормышка ашыру буенча да) 150 иң зур предприятие исәбенә кергән.
“CGGC International” вәкиле сүзләренә караганда, 2007 елда компания бәясе 3,5 миллиардтан да күбрәк АКШ доллары булган халыкара контрактларга кул куйган, 2008 елда – якынча 2 млрд. АКШ доллары торган контрактларга (шул исәптән Ливиядәге проект – 1 млрд. АКШ долларына). Бүгенге көнгә “CGGC International” дөньяның 30 илендә зур проектлар төзү тәҗрибәсенә ия.
Татарстан Республикасы Премьер-министры Рөстәм Миңнеханов кунакларга Татарстан Республикасында Нефть химиясе һәм нефть эшкәртү заводлары комплексы (Түбән Кама, “ТАНЕКО” ААҖ проекты), аммиак, метанол һәм гранулалы карбамид җитештерү буенча комплексны (Минзәлә, “Аммоний” ААҖ, проектның гомуми бәясе – якынча 1 млрд. АКШ доллары) торгызу кебек проектларны тормышка ашыру турында сөйләде.
“Моннан тыш, республиканың энергия системасын модернизацияләү программасы кысаларында кайбер проектларны гамәлгә ашыру да күздә тотыла”, - диде Рөстәм Миңнеханов.
2013 ел Универсиадасын үткәрү алдыннан республика башкаласы Казанда зур төзелешләр, шулай ук автомобиль юллары тармакларын модернизацияләү башланып китте.
Татарстан Республикасы Премьер-министры “CGGC International” вәкилләре өчен, проектлар турында тулырак күзаллау булдыру һәм аларда катнашу мөмкинлеге тудыру максатыннан, адреслы очрашулар оештырырга тәкъдим итте.
“CGGC International” вәкилләренең Татарстан Республикасына визиты 12 нче ноябрьгә кадәр барачак.