Иннополиста мәктәп укучылары өчен «Физмат прорыв» республика проекты тәкъдим ителәчәк
23-24 ноябрьдә Иннополис Университетында мәктәп укучылары һәм студентлар өчен «Киләчәк формуласы» ИТ-фестивале узачак, анда стартапларда, бигтехта һәм фәндә карьера турында мастер-класслар һәм панель дискуссияләр, төгәл фәннәр, ясалма интеллект, нанотехнологияләр, оптик күренешләр һәм космос буенча белем бирү лекцияләре һәм вакансияләр ярминкәсе булачак.
Чара кысаларында «Физмат прорыв» – 7-11 сыйныф укучылары өчен математикадан лекцияләр, интерактив станцияләр һәм башваткычлар белән шул ук исемдәге республика проекты фестивальләре сериясеннән беренчесе узачак. Укытучыларны шулай ук «Физмат прорыв» проекты буенча методик семинар һәм Татарстан Республикасы Премьер-министры урынбасары Роман Шәйхетдинов белән очрашу көтә.
Роман Шәйхетдинов хәбәр иткәнчә, «Физмат прорыв» проекты сентябрьдә Татарстан Республикасы Хөкүмәте инициативасы белән эшли башлаган, математика һәм физика белән мавыгучы укучылар санын арттыруга юнәлдерелгән һәм фәндә үз сәләтләрен кулланырга теләгән укытучыларга һәм укучыларга ярдәм күрсәтүгә юнәлдерелгән.
Иннополис Университеты ректоры Александр Гасников сүзләренчә, «Физмат прорыв» проектына республиканың 97 мәктәбеннән 100 математика түгәрәге һәм 20 физика-математика сыйныфы, 1537 укучы кушылган. Россиянең танылган галимнәре һәм тикшеренүчеләре Чаллы, Казан, Иннополис һәм башка шәһәрләрнең мәгариф учреждениеләрендә математика буенча 10нан артык ачык лекция үткәрделәр. «Физмат прорыв» масштаблашуын дәвам итә, 2027 елга инде 4000 укучыны җәлеп итү планлаштырыла.
Фестивальдә катнашу бушлай. 20 ноябрьгә кадәр теркәлү һәм программа сайтта: future-formula-innopolis.ru