Алексей Песошин: Казан федераль университеты – алдынгы белем бирү һәм фәнни үзәк кенә түгел, ә республиканың һәм илнең стратегик ресурсы да
Казан федераль университеты - алдынгы белем бирү һәм фәнни үзәк кенә түгел, ә республиканың һәм илнең югары дәрәҗәдәге профессионаллар әзерләүче стратегик ресурсы да. Бу хакта Татарстан Премьер-министры Алексей Песошин Казан федераль университетының Гыйльми советының киңәйтелгән утырышында белдерде. Чара югары уку йортына нигез салынуга 220 ел тулуга багышланды.
Алексей Песошин билгеләп үткәнчә, 220 яшь – олпатлык билгесе, ул тупланган фәнни-мәгариф потенциалын горурлык белән күрсәтергә мөмкинлек бирә. "Киң инновацион юнәлеш, заманча технологияләр, университет гамәлгә ашыра торган новаторлык проектлары заман белән бергә ышанычлы атларга, җитди тикшеренү эшләре белән шөгыльләнергә мөмкинлек бирә", - диде Татарстан Республикасы Хөкүмәте башлыгы. Ул билгеләп үткәнчә, бүген университетта 52 меңнән артык студент белем ала. Бу Татарстан студентларының өчтән бер өлеше.
"Университет үз тарихында исемнәре, ачышлары һәм казанышлары бөтен дөньяда танылган галимнәр, дәүләт һәм җәмәгать эшлеклеләре плеядасын әзерләде. Аларның һәрберсе артында үз үрнәге белән илһамландыручы һәм сайланган белем өлкәсенә мәхәббәт тәрбияләүче остаз, укытучы тора», - дип ассызыклады ТР Премьер-министры. Ул университетның укытучылар составына рәхмәт белдерде. "Үз тәҗрибәгез, белемегез, профессиональлегегез нәтиҗәсендә сез студентларга һәм белем сыйфатына таләпләрне югары дәрәҗәдә тотарга, илнең киләчәк казанышлары өчен кирәкле һәм югары квалификацияле кадрлар әзерләргә мөмкинлек бирәсез", - дип өстәде Алексей Песошин.
РФ Фән һәм югары белем министры Валерий Фальков Казан университетының кайбер факультетлары Татарстанда яңа югары уку йортларын ачу өчен нигез булды, дип искәртте: «Бу университетның илебезнең югары белем бирү системасын үстерүгә керткән өлеше. Аның шәкертләре, чыгарылыш укучылары һәм укытучылары Россия фәненең, мәдәниятенең һәм мәгарифенең данын тәшкил итә. Һәм бүген Казан федераль университеты лидерлар арасында ныклы урын алып тора». Россия Мәгариф һәм фән министрлыгы башлыгы соңгы елларда КФУның күтәрелештә булуын билгеләп үтте. "Бу төрле күрсәткечләр буенча сизелә. Мин студентлар саны артуны, Россиянең башка төбәкләреннән һәм чит илләрдән килгән укучылар һәм укытучылар арасында университетка ихтыяҗны, икътисадның реаль секторы белән тыгыз бәйләнешне, фәнни ачышларны, шулай ук тулаем югары белем бирү системасында югары уку йортының абруен күздә тотам», - дип ассызыклады Валерий Фальков.
КФУ ректоры Ленар Сафин билгеләп үткәнчә, ике гасырдан артык вакыт эчендә Казан университеты, химия, юридик, математика һәм башка бик күп күренекле фәнни мәктәпләр ачып, җитди уңышларга ирешә алды. Алар барысы да дөньякүләм танылуга иреште. «Бу еллар эчендә университет 90 меңнән артык белгеч әзерләде", - диде ректор. Бөек Ватан сугышының авыр елларында университетта СССР Фәннәр академиясенең Мәскәү һәм Ленинградтан килгән фәнни учреждениеләре урнаша. Бу югары уку йорты үсешенә яңа этәргеч бирә һәм дошманга каршы уртак көрәшкә зур өлеш кертә.
Бүген Казан федераль университеты барлык төп дәүләт программаларында катнаша: "Приоритет 2030», "Алдынгы инженерлык мәктәпләре" һ.б. 2 Чит ил филиалы уңышлы эшли. "Безнең барлык төп казанышларыбыз университетта эшләүчеләргә, безнең университетта тәрбияләнүчеләргә бәйле. Без галимнәребезнең уңышлары белән горурланабыз», - дип ассызыклады Ленар Сафин.
Утырыш кысаларында югары уку йорты хезмәткәрләре төрле югары бүләкләргә лаек булдылар. Шулай ук Гыйльми советта Берләшкән Гарәп Әмирлекләрендә Казан федераль университеты филиалын ачу турындагы килешүгә кул куелды.