Алексей Песошин: 10 ел эчендә республика икътисадына инвестицияләр күләме 2 тапкырдан күбрәккә артты
10 ел эчендә республика икътисадына инвестицияләр күләме 2 тапкырдан күбрәккә артты. Бу күрсәткеч буенча Татарстан Идел буе округында 1 нче урында һәм ил буенча 6 нчы урында тора. Бу хакта Казанда ТР Инвесторлар клубы утырышында республика Премьер-министры Алексей Песошин хәбәр итте.
Елның төп нәтиҗәләре турында Татарстан Республикасы Инвестицион үсеш агентлыгы җитәкчесе Талия Миңнуллина хәбәр итте. Тугыз ай нәтиҗәләре буенча Татарстан Республикасының төп капиталына инвестицияләр күләме 845,3 млрд сум тәшкил итә, бу чагыштырма бәяләрдә 2023 елның шул ук чоры белән чагыштырганда 2%ка күбрәк. "Төп капиталга инвестицияләр күләме, бюджет акчаларыннан тыш, 706,4 млрд сумга җитте", - диде Талия Миңнуллина. Ул узып баручы елның төп инвестицион трендлары исәбендә - логистикага, бүлү үзәкләренә, эчке туризмга һәм интеллектуаль милеккә инвестицияләр үсешен билгеләп үтте.
Аннары кайбер инвесторлар үз компанияләренең республикадагы эшенә йомгак ясадылар һәм киләсе елга планнарын билгеләделәр.
Алексей Песошин инвесторларга республика һәм тулаем ил икътисады үсешенә керткән өлешләре өчен рәхмәт белдерде. «Уртак тырышлык белән без зур уңышларга ирешәбез", - дип ассызыклады ул.
Премьер-министр билгеләп үткәнчә, Татарстан икътисадында мөһим структур үзгәрешләр бара. Сәнәгатьтә эшкәртү секторы һәм инновацион продукция өлеше, шулай ук чимал булмаган экспорт өлеше арта. "Татарстан инвесторлар өчен ышанычлы партнер булды һәм булып кала да, уңайлы бизнес-климат, заманча инфраструктура һәм инновацион хәл ителешләр тәкъдим итә. Илдәге инвестицион климат торышы буенча республика лидерлар өчлегенә керә. 2019 елдан бирле без тотрыклы рәвештә 2 нче урында торабыз", - диде Татарстан Республикасы Хөкүмәте башлыгы.
«Алабуга» МИЗ һәм «Иннополис» уңышлы эшләп килә, моношәһәрләрдә алгарышлы үсешнең биш территориясе бар. МИЗ һәм АҮТ резидентларына ташламалар республикага эре бизнес вәкилләрен җәлеп итәргә мөмкинлек бирә һәм кече һәм урта эшкуарлыкны үстерүгә ярдәм итә. Республиканың 100 сәнәгать паркында 1700дән артык резидент эшчәнлек алып бара, 70 меңгә якын эш урыны булдырылган. «Алабуга» МИЗ елга 60 мең контейнерлы логистик хаб төзелешен дәвам итә, бу тимер юл буенча йөк контейнерлары ташуны боҗраларга мөмкинлек бирәчәк.
Перспектив мәйданчык - Свияжск мультимодаль логистика үзәге актив үсеш ала. Шуның белән беррәттән, Татарстанда гамәлгә ашырыла торган яңа юллар һәм күперләр төзү һәм булганнарын реконструкцияләү буенча инфраструктура проектлары предприятиеләр өчен мөмкинлекләрне сизелерлек киңәйтә. Аларның сыйфаты һәм үткәрү сәләте генә үзгәрми, ә бизнесның яңа юнәлешләре барлыкка килү өчен шартлар да формалаша.
"Татарстан Хөкүмәте республиканың инвестицион потенциалын ил эчендә дә, халыкара мәйданда да киңәйтү мәсьәләләренә зур игътибар бирә. Россия Президенты ярдәмендә "Россия - Ислам дөньясы: KazanForum" халыкара форумы уза. 15 ел дәвамында форум үзен яңа элемтәләр урнаштыру, илебезнең икътисадый мөмкинлекләрен һәм инвестицион потенциалын тәкъдир итү өчен уңышлы бизнес-платформа буларак күрсәтте, - дип ассызыклады Алексей Песошин. - Күптән түгел Казанда "РОСТКИ" Россия-Кытай хезмәттәшлегенең II форумы узды. Быелның октябрендә Казанда узган БРИКС саммиты бөтен дөнья җәмәгатьчелеге өчен мөһим тарихи вакыйга булды».
Премьер - министр билгеләп үткәнчә, инвесторлар белән эшләү - Татарстан өчен өстенлекле бурычларның берсе. "Безгә инвестпроектлар санын арттыру гына түгел, ә Татарстанның инвестицион ачыклыгын тәэмин итү дә мөһим. Нәкъ менә шундый алым ярдәмендә безнең икътисад күп тармакларда тотрыклы үсеш күрсәтә. Ышанам ки, без бергәләп Татарстан һәм Россиянең социаль-икътисадый потенциалын алга таба да үстерә алачакбыз», - дип өстәде Алексей Песошин.
Аннары Татарстан Республикасы Хөкүмәте башлыгы республика дәүләт бүләкләрен тапшырды.
Татарстан Республикасы Инвесторлар клубы 2014 елда оешкан. Аның төп максатлары: бизнес һәм хакимиятнең үзара хезмәттәшлегенә ярдәм итү, инвесторлар белән элемтәне җайга салу, компанияләрнең Татарстанның инвестицион климатын формалаштыруда катнашуы, шулай ук төбәктә бизнес алып бару өчен уңайлы шартлар тудыру.