Алексей Песошин өч яңа энергетика объектларын сафка бастыруда катнашты
Бүген Татарстан Республикасы Премьер-министры Алексей Песошин яңа энергетика объектларын файдалануга тапшыруда катнашты
Бу Казан территориясендәге объектлар - «Водозабор» подстанциясе (ПС 110 кВ Водозабор), 110 кВ кабель линияләренең яңа участоклары, шулай ук Татарстанның Лаеш районындагы «Сокуры» подстанциясе (ПС 110 кВ Сокуры).
Чарада шулай ук «Сетевая компания» АҖ генераль директоры Илшат Фәрдиев, республиканың энергетика комплексы вәкилләре катнашты.
Татарстан Республикасы Премьер-министры яңа подстанцияне ачу тантанасында «Татарстан Республикасы икътисадының заманча үсеше ышанычлы энергия белән тәэмин итүдән башка мөмкин түгел. Кулланучыларны җитәрлек күләмдә һәм тиешле сыйфатта электр энергиясе белән тәэмин итү энергетиклар алдында торган төп бурычларның берсе булып тора. Ел саен яңа җитештерүләр сафка кертелә, электр энергиясен куллану арта».
Алексей Песошин белдергәнчә: "Технологик суверенитетны ныгыту һәм электр энергетикасы җайланмалары өлкәсендә импортны алмаштыру буенча чараларны уңышлы гамәлгә ашыру илнең энергетика стратегиясенең аерылгысыз өлеше булып тора.
«Сетевая компания» акционерлык җәмгыятенең энергетика кластерларын үстерү өлкәсендәге сәясәте һәм кирәкле җайланмаларны заманча югары технологияле җитештерүне җайга салган республикада төзелгән предприятиеләр белән тыгыз хезмәттәшлек Татарстан электр челтәре комплексының ышанычлы һәм тотрыклы эшен тәэмин итүче нигез булып кала».
Яңа «Сокуры» подстанциясе төзелеше районның зур потенциалына, электр энергиясен куллануның шактый үсүенә, торак комплекслар, коттедж бистәләре төзелешенең һәм сәнәгать кулланучыларының технологик тоташтыруларының бик нык үсүенә бәйле.
Алексей Песошин искәрткәнчә, подстанция дистанцион рәвештә тоташтырырга һәм сүндерергә, ремонтка чыгарырга һәм теләсә нинди тоташтыруны эшкә кертергә мөмкинлек бирә торган югары технологияле җайланмалар белән җиһазландырылган.
"Водозабор"модернизацияләнгән подстанциясе - Казандагы өченче цифрлы подстанция. Концепция искергән аналог системалардан баш тартуны һәм бердәм цифрлы идарә мохите булдыруны күздә тота. 110 кВ (киловольт) кабель-һава линияләренең өч яңа участогын төзү Казанның Киров, Мәскәү һәм Вахитов районнарын электр белән тәэмин итә торган энергетик артерияне яңарта.
Алексей Песошин объектларны сыйфатлы һәм вакытында төзегән подрядчыларга һәм тәэмин итүчеләргә аерым рәхмәт белдерде. Татарстан өчен 2024 ел күп кенә халыкара чаралар белән истә калды, аларны өзлексез энергия белән тәэмин итүне «Сетевая компания» акционерлык җәмгыяте уңышлы башкарып чыкты, дип билгеләп үтте Татарстан Республикасы Премьер-министры, ирешелгән нәтиҗәләр, «Сетевая компания»нең тупланган тәҗрибәсе һәм потенциалы республиканың икътисадый һәм социаль өлкәләрен үстерү бурычларын уңышлы хәл итүнең нигезе булачак.
Алексей Песошин шулай ук энергетикларны узган һөнәри бәйрәмнәре - Энергетик көне һәм якынлашып килүче Яңа ел белән котлады.