Шамил Гаффаров: Муниципаль берәмлекләр юл хәрәкәте иминлеге линиясе буенча эшләп бетермиләр, бу хакта статистика да күрсәтә
Бүген Татарстан Республикасы Премьер-министры урынбасары – Татарстан Республикасы Министрлар Кабинеты Аппараты җитәкчесе Шамил Гаффаров юл хәрәкәте иминлеген тәэмин итү буенча Татарстан Республикасы Хөкүмәт комиссиясе утырышын уздырды.
Чара ТР Хөкүмәте Йортында видеоконференцэлемтә аша республиканың барлык муниципаль районнарын тоташтырып узды. Утырышта юл хәрәкәте иминлеген тәэмин итү буенча ТР Хөкүмәт комиссиясе әгъзалары, юл, автотранспорт комплексы, территориаль эчке эшләр органнары һәм юл хәрәкәте иминлеге дәүләт инспекциясе җитәкчеләре катнашты.
Шамил Гаффаров хәбәр иткәнчә, 2019 елда башланган «Имин сыйфатлы юллар» илкүләм проекты 2024 елда төгәлләнде. Быелдан башлап яңа илкүләм проект - «Яшәү өчен инфраструктура» гамәлгә ашырыла.
"Гомумән алганда, илкүләм проектны гамәлгә ашыру чорында без 2017 ел белән чагыштырганда аварияләр күрсәткечләренең ел саен кимүен тәэмин итә алдык, - дип искәртте Шамил Гаффаров. - 2025 елда аварияләрне профилактикалауга комплекслы якын килүне дәвам итәргә һәм куелган бурычлар өчен мөмкин булганның барысын да эшләргә, ә иң мөһиме - кешеләр гомерләрен саклап калырга кирәк. Кызганычка каршы, 2025 елның 5 мартына без инде 38 кешене югалттык.
Гыйнвар аеруча катлаулы булды - 23 кеше һәлак булды. Вәзгыятьне тотрыкландыру максатыннан Хөкүмәт комиссиясенең 3 утырышы уздырылды, төрле характердагы чаралар күрелде, бу, һичшиксез, нәтиҗә бирде. Муниципаль берәмлекләрнең юл хәрәкәте иминлеге линиясе буенча эшләп бетермәвен әйтергә мәҗбүр. Бу хакта статистика да күрсәтә – җирле юлларда авариялелек күрсәткечләренең үсеше".
Мисал өчен Шамил Гаффаров юл-транспорт һәлакәтләре буенча мәгълүматларны бары тик җирле автомобиль юлларында гына китерде. Әйтик, 2024 елның 2 аенда җирле автомобиль юлларында 260 юл-транспорт һәлакәте булган, аларда 8 кеше һәлак булган һәм 297 кеше яраланган булса, 2025 елның шул ук чорында - 277 юл-транспорт һәлакәте, аларда 11 кеше һәлак булган һәм 338 кеше яраланган. Юл-транспорт һәлакәтләре саны - 17 очрак, һәлак булучылар – 3, яраланучылар - 41 кеше.
Шамил Гаффаров килеп туган вәзгыятьне анализларга, республика юлларында иминлекне тәэмин итүгә юнәлдерелгән чараларны билгеләргә кушты.
Татарстан Республикасында аварияләр торышы һәм юл хәрәкәте иминлеген тәэмин итү буенча күрелә торган чаралар турында Татарстан Республикасы буенча Юл хәрәкәте иминлеге баш дәүләт инспекторы Рөстәм Гарипов сөйләде.
Ул хәбәр иткәнчә, «Яшәү өчен инфраструктура» яңа илкүләм проектына «Юл хәрәкәте иминлеге» федераль проекты паспорты кертелгән (2025-2030 елларга). Россия буенча, шул исәптән субъектлар буенча аварияләр күрсәткечләре формалаштырылган. Һәр муниципаль берәмлеккә «Юл хәрәкәте иминлеге» федераль проектының исәп-хисап күрсәткечләре, шулай ук соңгы 6 елда яңартылган «Аварияләргә комплекслы анализ» җибәрелгән.
Рөстәм Гарипов ассызыклаганча, бу юл-транспорт һәлакәтенең сәбәбен, сезонлылыгын, проблемалы участокларын билгеләргә мөмкинлек бирә торган нәтиҗәле корал.
Гомумән алганда, 2025 елның ике ае нәтиҗәләре буенча республиканың барлык автомобиль юлларында 380 юл-транспорт һәлакәте теркәлгән, аларда 37 кеше һәлак булган һәм 486 кеше яраланган.
2024 елның шул ук чоры белән чагыштырганда аварияләр саны кимү күзәтелә. Татарстан муниципаль районнары буенча һәлак булучылар саны 10 муниципаль берәмлектә арткан. Бу Казан, Чаллы шәһәрләре, Апас, Арча, Бөгелмә, Чүпрәле, Кукмара, Лаеш, Югары Ослан, Тәтеш районнары.
Шул ук вакытта 2025 елның 2 ае нәтиҗәләре буенча Казанда, Югары Ослан, Лаеш һәм Тәтеш районнарында авариялелек күрсәткечләренең артуы күзәтелә, илкүләм проектның фаразланган күрсәткечләренә ирешелмәгән.
Автомобиль юлларында һәлак булучыларның күбесе төбәк әһәмиятендәге юлларга туры килә, бераз азрак - федераль әһәмияттәге юлларга.
Җирле халыкта вәзгыять тулаем катлаулана, авариялелек күрсәткечләренең артуы күзәтелә. Федераль һәм төбәк әһәмиятендәге юлларда һәлак булучыларның төп өлеше бәрелешләргә туры килә. Җирле әһәмияттәге юлларда бу бәрелешләр һәм җәяүлене бәрдерү.
Рөстәм Гарипов ассызыклаганча, юл-транспорт һәлакәтләрендә пассажир балалар имгәнүләре аеруча борчу тудыра.
Ул билгеләп үткәнчә, һәлакәт очрагында балалар вәзгыять нәтиҗәсенә бернинди дә йогынты ясый алмый, чөнки пассив куркынычсызлык чараларын куллану да күп очракта өлкәннәргә бәйле.
ТР буенча ЮХИДИнең баш дәүләт инспекторы искә төшергәнчә, 2024 елда 3 пассажир бала һәлак булган. "Кызганычка каршы, агымдагы елда да балаларны йөртү проблемасы актуаль булып кала", - дип хәбәр итте Рөстәм Гарипов.
Республиканың 8 муниципаль районында бала пассажирлар катнашында юл-транспорт һәлакәтләренең артуы теркәлгән. Күпчелек очракта фаҗигаләрдә балаларның әти-әниләре яки баланың гомерен һәм сәламәтлеген саклап калу өчен мөмкин булганның барысын да эшләмәгән туганнары гаепле була.
Татарстан Республикасы юлларында юл хәрәкәте иминлеген арттыру буенча инженерлык чараларын гамәлгә ашыру турында Татарстан Республикасы транспорт һәм юллар хуҗалыгы министры Фәрит Хәнифов сөйләде.
«Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев массакүләм мәгълүмат чараларында юл хәрәкәте иминлеге темасын мәгълүмати яктырту турында сөйләде. Аннары Лаеш, Югары Ослан муниципаль районнары җитәкчеләре чыгыш ясады, аларда аварияләр күрсәткечләре узган елның шушы чоры белән чагыштырганда артыграк.
Шамил Гаффаров юл хәрәкәте иминлеген профилактикалау өчен массакүләм мәгълүмат чараларын җәлеп итәргә кушты. Ул шулай ук бу темага популяр җирле блогерларны җәлеп итәргә, шулай ук билбордларда юл хәрәкәте иминлеге буенча социаль реклама урнаштырырга тәкъдим итте.