Алексей Песошин «ФармМедОбращение - 2025» конференциясендә катнашучыларны сәламләде
Татарстан Премьер-министры Алексей Песошин «Дарулар әйләнеше өлкәсендә дәүләт җайга салуы-ФармМедОбращение 2025» 27 нче еллык бөтенроссия конференциясендә катнашучыларны сәламләде. Пленар утырыш «Казан Экспо»да узды. Модераторы - Росздравнадзор башлыгы Алла Самойлова. Конференция дарулар әйләнеше өлкәсендә төп тармак чараларының берсе булып тора. Ел саен әлеге мәйданчык фәнни-тикшеренү һәм иҗтимагый оешмалар экспертларын, фармацевтика җитештерүләре, күпләп һәм ваклап сату оешмалары, контроль-аналитик лабораторияләр, һөнәри ассоциацияләр җитәкчеләрен һәм белгечләрен, дәүләт хакимияте органнары вәкилләрен җыя. Алексей Песошин билгеләп үткәнчә, конференция бөтен сәламәтлек саклау системасы өчен мөһим һәм әһәмиятле вакыйга булып тора. "Ышанам ки, сез алачак белемнәр сезнең эшчәнлектә чагылыш табар. Конференциядә катнашучыларның барысына да актив һәм нәтиҗәле эш, яңа кызыклы идеяләр һәм уңышлар телим", - диде Татарстан Республикасы Премьер-министры. Аннары ул конференциядә катнашучыларга һәм оештыручыларга Татарстан Рәисе Рөстәм Миңнехановның сәламләвен укыды: "Хөрмәтле конференциядә катнашучылар! Сезне "Дарулар әйләнеше өлкәсендә дәүләт җайга салуы-ФармМедОбращение 2025" 27 нче еллыкбөтенроссия конференциясендә сәламләвемә шатмын. Күп еллар дәвамында әлеге абруйлы дискуссия мәйданчыгында закон чыгару һәм башкарма хакимият органнары, медицина һәм фармацевтика тармагы профессионаллары, гражданлык җәмгыятенең актив вәкилләре кискен мәсьәләләр турында фикер алышалар һәм бергәләп чишелешләр эзлиләр. Татарстан гадәттәгечә гражданнарның сәламәтлеген саклау мәсьәләләренә өстенлекле игътибар бирә. Сәламәтлек саклау учреждениеләренең матди-техник базасын ныгыту өлкәсендә зур эш башкарыла. Соңгы 5 елда гына да республикада 238 медицина учреждениесе төзелде, 500дән артык сәламәтлек саклау объектына капиталь ремонт ясалды, 20 мең берәмлек заманча җиһаз сатып алынды, югары технологияле медицина ярдәме күләме 130 мең очрактан артып китте. Бу тырышлык сизелерлек нәтиҗәләр китерә. Татарстанда гомер озынлыгы 74,5 елдан артып китте. Әлеге күрсәткеч буенча республика Идел буе федераль округында 1 нче урында тора. Йөрәк-кан тамырлары һәм онкология авыруларыннан үлүчеләр саны кимү тенденциясе күзәтелә. Сәламәтлек саклау системасында дарулар әйләнешен нәтиҗәле җайга салу мөһим роль уйный. Халыкны куркынычсыз, сыйфатлы һәм һәркем файдалана алырлык препаратлар белән тәэмин итү – бу комплекслы эшнең аерылгысыз өлеше. Татарстан фармацевтика тармагын үстерүгә актив ярдәм күрсәтә, шул исәптән импортны алмаштыру программаларын гамәлгә ашыру кысаларында да. Конференцияне уздыру илдә дарулар әйләнешен дәүләти җайга салу системасын камилләштерергә ярдәм итәр дип ышанам. Сезгә уңышлы эш, конструктив дискуссияләр һәм яңа һөнәри казанышлар телим" Россия Сәламәтлек саклау министры Михаил Мурашко үзенең видеомөрәҗәгатендә билгеләп үткәнчә, гражданнарны сыйфатлы, нәтиҗәле, куркынычсыз дарулар белән тәэмин итү мәсьәләләре һәрвакыт дәүләт тарафыннан югары игътибар һәм контроль зонасында тора. "Бүген ил файдасына 550дән артык фармацевтика производствосы эшли. 2024 елда гражданнар әйләнешенә 6 млрд төргәк дару препаратлары чыгарылган, шуларның 70%ы үзебездә җитештерелгән. Соңгы 3 елда теркәлгән дару препаратларының 82% ы үзебездә җитештерелгән яки Россиядә локальләштерелгән", - дип хәбәр итте министр. Ул Россия Федерациясенең дару препаратлары базарының үтә күренмәлерәк булуына игътибар итте. "Без бүген контрафакттан, фальсификаттан саклану ысулларына ия, һәм бу шул исәптән уздырыла торган контроль-күзәтчелек чаралары ярдәмендә. Без контроль һәм күзәтчелекне гамәлгә ашырганда куркыныч-юнәлешле алым куллана башладык, бу зыянны булдырмау һәм намуслы оешмаларга йөкләнешне киметү өчен ресурсларны югары куркыныч зоналарына тупларга мөмкинлек бирә», - дип өстәде РФ Сәламәтлек саклау министрлыгы башлыгы. Конференциядә катнашучылар дарулар мөрәҗәгате, фармпрепаратларның сыйфатына экспертиза һәм сынау, илдә фармацевтика белемен үстерү, дәүләт даруханә челтәрләренең роле һәм бурычлары, фармацевтика секторының дистрибьютор сегментын үстерү перспективалары һәм фармаконадзор системасының әһәмияте мәсьәләләре буенча фикер алыштылар.