Гадәттән тыш хәлләрне кисәтү комиссиясе утырышында Татарстан мәктәпләренең яңа уку елына әзерлеге турында фикер алыштылар
Бүген Татарстан Министрлар Кабинетында Гадәттән тыш хәлләрне кисәтү һәм бетерү, янгын куркынычсызлыгын тәэмин итү комиссиясенең чираттагы утырышы узды. Утырышны Татарстан Республикасы Премьер-министрының беренче урынбасары - Комиссия рәисе урынбасары Рөстәм Нигъмәтуллин үткәрде.
Төп тема - Татарстан Республикасы гомуми белем бирү оешмаларының яңа уку елына әзерлеге.
Рөстәм Нигъмәтуллин хәбәр иткәнчә, бу мәсьәлә буенча алып барыла торган эш - даими һәм планлы. "Ел саен махсус комиссияләр барлык мәгариф оешмаларының яңа уку елына әзерлеген тикшерә, - диде ул. - Бу процесс закон тарафыннан федераль дәрәҗәдә һәм ведомство норматив документларында билгеләнгән. Яңа уку елында республика территориясендә 3307 мәгариф учреждениесе ачылырга әзерләнә, шулардан 1620 мәктәп. Тикшерүләр предметы - белем бирү оешмаларының торышы, аларның яңа уку елына әзерлеге һәм укучыларның тормыш эшчәнлеген тәэмин итү, бигрәк тә көзге-кышкы чорда».
Рөстәм Нигъмәтуллин билгеләп үткәнчә, башкарылган эшләргә карамастан, укучыларның иминлегенә йогынты ясый торган җитешсезлекләр ачыклана. Узган уку елында Чаллы һәм Казан мәктәпләрендә янгыннар чыккан.
Гомуми белем бирү оешмаларының яңа уку елына әзерлеге турында Татарстан Республикасы мәгариф һәм фән министры урынбасары Андрей Рюхов сөйләде.
Ул хәбәр иткәнчә, республикада 1620 мәктәп белем бирү эшчәнлеген гамәлгә ашырырга планлаштыра. Яңа 2025-2026 уку елында укучыларның фаразланган саны 521 меңнән артык кеше тәшкил итә. Беренче сыйныфка быел 49 меңнән артык бала барачак. Быел шулай ук 2448 урынга исәпләнгән ике яңа мәктәп һәм 611 урынга исәпләнгән өстәмә өч корпус сафка бастырылачак.
"Яңа уку елына әзерлек кысаларында республикада ведомствоара муниципаль кабул итү комиссияләре төзелде. Кабул итү эшләре 28 июльдән 14 августка кадәр бара, - дип хәбәр итте нотыкчы. -Уку елына әзерлек кысаларында мәктәпләрнең техник торышы һәм матди-техник базасын яхшыртуның нәтиҗәле механизмнарының берсе - капремонт программасын гамәлгә ашыру». Яңа уку елына әзерлек кысаларында гомуми белем бирү оешмаларының янгын куркынычсызлыгы торышы турында Россия Гадәттән тыш хәлләр министрлыгының
Татарстан Республикасы буенча Баш идарәсенең күзәтчелек эшчәнлеге идарәсе башлыгы Максим Трущин сөйләде. Ул янгыннар турында хәбәр итте. Гомумән алганда, ил буенча быел мәгариф учреждениеләрендә 192 янгын теркәлгән, бу алдагы чорга охшаш диярлек.
Татарстанда узган 5 елда гомуми белем бирү учреждениеләрендә 22 янгын булган. 2025 елның узган чорында – ике янгын. Янгыннарның төп сәбәпләре - электр җайланмаларын куллану кагыйдәләрен бозу - аларга гомуми янгыннарның 50%ы туры килә, ягъни 11 очрак, балаларның ут белән шаяруы – 6 янгын, ут белән саксыз эш итү - 4 янгын.
Максим Трущин искә төшергәнчә, 2025 елның апрелендә Чаллыдагы 61 нче гимназия бинасында янгын чыккан. Сәбәбе - электр җайланмаларыннан файдаланганда янгын куркынычсызлыгы кагыйдәләрен бозу (янгын мәйданы 1 кв.м). 2025 елның маенда Казанның 65 нче мәктәбендә янгын чыккан. Сәбәбе - укучыларның балалык шаяруы (янгын мәйданы 15 кв метр тәшкил иткән). "Янгын куркынычсызлыгын тәэмин итү мәсьәләсе Россия Гадәттән тыш хәлләр министрлыгы эшчәнлегенең өстенлекле юнәлешләреннән берсе булып тора, - диде Максим Трущин. - Дәүләт янгын күзәтчелеге органнары тарафыннан 1620 гомуми белем бирү учреждениесе исәпкә алынды. Шулай ук, әйтелгәнчә, 1 сентябрьдән ике яңа мәктәп һәм ике өстәмә корпус файдалануга тапшыру планлаштырыла".
Нотыкчы ассызыклаганча, яңа уку елына әзерлек барышында профилактик контроль-күзәтчелек чаралары үткәрелә. Алар барышында 135 мәктәптә 252 хокук бозу очрагы ачыкланган. «Күп кенә матди кертемнәргә карамастан, аерым учреждениеләрнең торышы таләп ителгән дәрәҗәдәге янгын куркынычсызлыгын тәэмин итми, - диде ул. - Хокук бозулар булган иң күп учреждениеләр Казанда – 57 мәктәп, Чаллыда – 32 мәктәп, Лаеш районында – 13 мәктәп, Нурлат районында – 11 мәктәп».
Утырышка йомгак ясап, Рөстәм Нигъмәтуллин түбәндәгеләрне искәртте: башкарма хакимият һәм җирле үзидарә органнарының өстенлекле бурычы - балаларның гомерен һәм сәламәтлеген, шулай ук белем бирү процессының сыйфатын саклап калу өчен имин шартлар тудыру.