Татарстанда файдалануга торак тапшыру буенча еллык план 81%ка үтәлгән, 2 млн 638 мең кв. м файдалануга тапшырылган

Бүген ТР Хөкүмәте Йортында узган киңәшмәдә ТР төзелеш, архитектура һәм торак-коммуналь хуҗалык министры Марат Айзатуллин Татарстанның төзелеш тармагында җитештерүдәге имгәнүләрне профилактикалау өчен күрелә торган чаралар турында сөйләде.

Киңәшмәне Татарстан Рәисе Рөстәм Миңнеханов үткәрде. Видеоконференцэлемтә режимында республиканың барлык муниципаль районнары да тоташтырылды.

ТР Төзелеш министрлыгы башлыгы хәбәр иткәнчә, ел башланганннан бирле төзелеш мәйданчыкларында 6 үлем очрагы һәм бер бик авыр очрак булган. Гыйнвардан үзлегеннән җайга салынучы оешмалар 1 742 тикшерү уздырган. Тикшерү барышында ачыкланган хокук бозучыларга карата 721 тапкыр дисциплинар йогынты чаралары кулланылган.

Дәүләт төзелеше күзәтчелеге инспекциясе шул ук чорда мәйданчыкларга 1 070 тапкыр чыккан. Ведомство белгечләре кайбер хокук бозуларны теркәгән, алар буенча административ җаваплылык турында 325 карар чыгарылган. Иң күп хокук бозулар дәүләт һәм республика программалары кысаларында төзелә торган объектларда теркәлгән. Баш инвестиция-төзелеш идарәсе ел башланганнан бирле 1 925 контроль-күзәтчелек чарасы уздырган, алар барышында 4 265 хокук бозу очрагы теркәлгән, шуларның 4 053е бүгенге көнгә бетерелгән.

Министр торак төзелешенең актуаль статистикасын китерде.Файдалануга торак тапшыру буенча еллык планның үтәлеше - 81%, ягъни 2 млн 638 мең кв. м.  

Коммерциячел торак секторында план 34%ка үтәлгән. Файдалануга тапшырылган 72 күп фатирлы йортның мәйданы 578 мең кв. метрдан артып китә.

Социаль ипотека программасы буенча еллык йөкләмәләр 73%ка башкарылган. 2025 елга планда 35 йортны файдалануга тапшыру каралган, шуларның 15е бүгенгә әзер. Файдалануга тапшырылган йортларның гомуми мәйданы 118 мең кв. м тәшкил итә.

Иң кызу темплар белән шәхси торак төзелеше бара. Файдалануга тапшырылган йортларның гомуми мәйданы - 1 млн 942 мең кв. м.

Аннары Марат Айзатуллин гражданнарның аерым категорияләрен торак белән тәэмин итү программасы турында сөйләде. Ятим балалар өчен билгеләнгән 204 торак урынга өч дәүләт контракты төзелгән.

Яшь гаиләләр категориясендә субсидияләрне 49 кеше файдаланган, бу категориядәге тагын 20 кеше торак вариантларын сайлау белән мәшгуль.

Биш һәм аннан да күбрәк баласы булган гаиләләр категориясендә 27 сертификатның 9ы 881 кв.м. мәйданга сатылган. Калган 18 сертификат иясе өчен торак урыннарын ТР Дәүләт торак фонды сайлап ала.

Мәҗбүри күчеп килүчеләр, чернобыльчеләр һәм Ерак Төньяктан күчеп килүчеләр категориясендә еллык йөкләмәләр тулы күләмдә үтәлгән - торакны өч алучы да сатып алган.

Нотыкның чираттагы блогы социаль-мәдәни объектлар төзү буенча дәүләт һәм республика программаларын гамәлгә ашыруга багышланды. Торак төзелешенә ярдәм итү ике программаның максаты булып тора. Бу «Күп балалы гаиләләр өчен җир кишәрлекләрен төзекләндерү» дигән яңа республика программасы, анда су белән тәэмин итү челтәрләре һәм юллар төзү каралган. Юлларга дәүләт контрактлары төзелгән, подряд оешмалары мәйданчыкларда эшли башлаган. Гомуми үтәлеш 44% тәшкил итә.

Су белән тәэмин итү челтәрләре төзелешендә башкарылган эшләрнең агымдагы күрсәткече - 12%. Торак төзелешенә ярдәм итүгә юнәлдерелгән икенче программа - "Авыл территорияләрен комплекслы үстерү", аның өч объекты буенча үтәлеше 86% дип бәяләнә.

Мәгариф өлкәсендәге 13 объектның 8е - гомуми белем бирү мәктәпләре. Алар буенча төзелеш-монтаж эшләре 81%ка үтәлгән. Мондый күрсәткечкә өч мәктәптә - Лаеш һәм Тукай районнарында һәм Чаллыда төзелеш-монтаж эшләрен төгәлләү хисабына ирешелгән. Биш мәктәпкәчә гомуми белем бирү учреждениесе буенча гомуми эш күләменең 57%ы үтәлгән. Узган ике атнада Биектау районында бер объект төзелеп беткән.

Сәламәтлек саклау инфраструктурасы быел 53 объектка киңәйтеләчәк, шуларның 47се – фельдшер-акушерлык пунктлары. Алар буенча төзелеш-монтаж эшләренең гомуми үтәлеше бүгенге көнгә 99% дип бәяләнә. Хисап атнасында республиканың 12 районында 13 объектта эшләр төгәлләнгән. Башка медицина учреждениеләрен төзү өлешендә башкару күрсәткече 85%ка җиткән. Узган ике атнада Казанда ике поликлиника төзелеше төгәлләнгән.

Яшьләр сәясәте линиясе буенча гамәлгә ашырыла торган программалар белән 11 объект төзү каралган, алар арасында - әзерлеге 83% дип бәяләнә торган өч яшьләр үзәге һәм республика программасына керә торган 8 балаларны савыктыру лагере. Алар буенча үтәлеш 51% тәшкил итә. Соңгы ике атнада балалар лагерьлары исемлеге Зеленодольск районында объект белән тулыланган.

Быел төзелә торган 23 спорт корылмасының иң зурысы - Футболны үстерү үзәге, аның әзерлеге агымдагы көнгә 45% тәшкил итә. Дүрт футбол манежы төзелеше Россия Төзелеш министры Ирек Фәйзуллин катнашында объектларны ачу тантанасы белән тәмамланган. Соңгылардан булып Кукмара һәм Баулы районнарында манежлар тапшырылган. Быел төзелә торган барлык дүрт мәдәният объекты да «Авыл территорияләрен комплекслы үстерү» дәүләт программасының бер өлеше булып тора. Ике күп функцияле үзәк төзелешендә һәм район мәдәният йортын реконструкцияләүдә үтәлеш 46%ка җиткән.

Экология өлкәсендә соңгы елларда иң эре объект - Казандагы ләм кырларын рекультивацияләү, ул «Экологик иминлек» илкүләм проектына кертелгән. Аның әзерлеге 92% тәшкил итә.

Башка өч республика программасына 25 объект кертелгән. Әйтик, 16 башкарма комитет төзелеп беткәнче бер проценттан да кимрәк вакыт калган. Төзелеп беткән 14 бина исәбенә подрядчылар тарафыннан узган ярты айда тапшырылган өч объект керә. Халыкка комплекслы хезмәт күрсәтүче җиде пунктның берсе генә эшләнә әле - Чүпрәле районындагы объект. Биредә эшләрнең гомуми үтәлеше – 93%. Янгын сүндерү депосының ике бинасы төзелешендә үтәлеш 88% тәшкил итә.

Җәмәгать киңлекләрен төзекләндерү буенча республика һәм федераль программаларда 61 объектны яңарту каралган. Шуларның 38е эшләнә. Хисап чорында республиканың Югары Ослан, Аксубай, Әтнә, Балык Бистәсе, Әлки һәм Биектау районнарында берешәр объект төзелеп беткән. Юнәлеш буенча эшләрнең гомуми үтәлеше – 80%.

Алга таба федераль һәм республика программаларында каралган инженерлык челтәрләрен модернизацияләү турында. Подрядчылар эшнең югары темпларын күрсәтәләр.

Халыкны эчәр сулар белән тәэмин итү программасы буенча планлаштырылган күләмнең 89%ы үтәлгән. Программага 88 объект кертелгән, аларның 54е инде әзер, шул исәптән хисап атнасында тәмамланган 10 объект та. Чистарту корылмаларын модернизацияләү һәм канализация челтәрләрен капиталь ремонтлау буенча гомуми үтәлеш 61% тәшкил итә.

Бюджет учреждениеләрендә блок-модульле котельныйлар һәм тыштан урнаштырыла торган казаннар урнаштыру программасы төгәлләнгән. Барлык 32 программа объекты да әзер.

Урамнарны яктыртуны торгызу программасы буенча торак пунктларда 263 объект төгәлләнгән. Программа чараларының гомуми үтәлеше - 78%. «Авыл территорияләрен комплекслы үстерү» дәүләт программасының дүрт объекты буенча бу күрсәткеч 88% тәшкил итә. Шул ук чорда Әгерҗе районында бер объект төзелеп беткән.

Министр хәбәр иткәнчә, коммуналь инфраструктураны модернизацияләү буенча республика һәм федераль программаларда каралган чаралар 82%ка үтәлгән. 136 программа объектының 97се подряд оешмаларында эшләнә. Соңгы ике атнада 14 объект төзелеп беткән.

Нотыгы азагында Марат Айзатуллин җылы бирү чорына әзерлек турында мәгълүмат китерде. Муниципаль районнар тарафыннан «Торак фонды мониторингы» системасына кертелгән мәгълүматларга караганда, тулаем республика буенча торак фонды өлешендә әзерлек паспортларын рәсмиләштерү эше 50%ка башкарылган.