Татарстан Республикасы делегациясе нанотехнологияләр буенча беренче халыкара форумда катнаша

Бүген Татарстан Республикасы Премьер-министрының беренче урынбасары Борис Павлов җитәкчелегендәге Татарстан Республикасы делегациясе нанотехнологияләр буенча беренче халыкара форумда катнаша. Ул Мәскәүдә (Кызыл Преснадагы Экспоүзәк) ачылды.
Татарстан делегациясе составында – Татарстан Республикасының сәнәгать һәм сәүдә министры Александр Когогин, Татарстан Республикасы икътисад министры урынбасары Наил Гобәев, Татарстан Республикасы Фәннәр академиясенең вице-президенты Әсхәт Гомәров, КДТУ (КХТИ) ректоры Герман Дьяконов, КДТУ (КАИ) президенты Геннадий Дегтяров һәм башкалар.
Форум кысаларында Россия, Австрия, Германия, Латвия, АКШ, Финляндиядән килгән компанияләр наноиндустриясенең перспектив эшләнмәләре һәм әзер продукцияләре күргәзмәсе бара. Пленар утырыш башланыр алдыннан Россия Хөкүмәте рәисе урынбасары Сергей Иванов, Россия Федерациясенең икътисади үсеш министры Эльвира Нәбиуллина, “Роснано” ның генераль директоры Анатолий күргәзмәне карап чыктылар.
Татарстан Республикасы экспозициясен Борис Павлов тәкъдир итте.
Моннан тыш, Татарстанның беренче вице-премьеры “Нанотехнологияләр үсешенең төбәк программалары – яңа инвестицион мөмкинлекләр” секциясендә доклад белән чыгыш ясады. Ул, аерым алганда, республикада нанотехнологияләр кластерының үсеше һәм аның икътисад тармаклары белән үзара бәйләнеше турында хәбәр итте.
Россиянең Икътисади үсеш министрлыгы вәкилләре фикеренчә, Татарстанда нанотехнологияләр тармагы, илнең башка төбәкләре белән чагыштырганда, тизрәк үсә.
Нанотехнологияләр буенча беренче халыкара форумның эше 5 нче декабрьгә кадәр дәвам итәчәк.
Чараны Россия нанотехнологияләр корпорациясе (“Роснано”) оештырды.