Татарстан Республикасы Премьер-министры Рөстәм Миңнеханов: “Республиканың барлык предприятиеләре үзләренең кризиска каршы тору программаларына ия булырга тиеш”

Бүген Татарстан Республикасы Премьер-министры Рөстәм Миңнеханов Икътисади советның чираттагы утырышын үткәрде.
Республикадагы агымдагы хәл турында Татарстан Республикасының икътисад министры Марат Сафиуллин сөйләде.
Моннан тыш, Татарстан Республикасы Министрлар Кабинеты каршындагы Икътисади совет әгъзалары “Татэнерго” ААҖ генераль директоры Илшат Фәрдиевнең энергетика өлкәсендәге проблемалар турындагы докладын тыңладылар.
“Нижнекамскнефтехим” ААҖ ндәге икътисади хәл һәм 2008 елда предприятиенең алдан уйланган нәтиҗәләре турындагы доклад белән генераль директор урынбасары Рөстәм Әхмәтов чыгыш ясады.
Икътисади совет әгъзалары “Татэнерго” ААҖ нең зур сәнәгый предприятиеләр белән үзара бәйләнеше һәм киләчәктә җылылык энергиясе белән тәэмин итү турында фикер алыштылар. Илшат Фәрдиев республикада резерв ягулыкның (мазут, күмер) төп запаслары булдырылуын әйтте.
Татарстан Премьер-министры Рөстәм Миңнеханов бүгенге көндә республиканың бөтен предприятиеләре үзләренең кризиска каршы тору программаларына ия булырга тиешлеген искәртте. “Моннан тыш, республиканың азык-төлек базарында түбән бәяле беренче дәрәҗәдәге кирәкле товарларның (сөт һәм ит продуктлары, икмәк-булка әйберләре, ярмалар, сезонлы яшелчәләр һ.б.) җитәрлек күләмдә булуына төп игътибар юнәлтергә кирәк”, - дип билгеләп үтте ул.
Татарстан Республикасы Премьер-министры сүзләренә караганда, икътисади советның киләсе утырышын эчке базарны контрафакт продукциядән саклау мәсьәләләре турында фикер алышуга багышлау күздә тотыла.