ТР Премьер-министры Илдар Халиков “Эфир” телеканалында “Актуальная тема”алып баручысының сорауларына җавап бирде

Бүген Татарстан Республикасы Премьер-министры Илдар Халиков “Эфир” телеканалында “Актуальная тема” программасын алып баручының сорауларына җавап бирде.
Илдар Халиков 2013 нче елда Татарстанның төп казанышы дип, Казанда XXVII Бөтендөнья җәйге студентлар уеннары - Универсиаданы әзерләү һәм уздыруны атады. Аның сүзләренчә, 2013 нче ел Татарстанлыларның күбесе өчен Универсиаданы уздыру елы буларак истә калачак. ФИСУ (FISU) башкарма комитеты вәкилләре бәяләве буенча да Казандагы Универсиада “ФИСУ тарихында иң яхшы” булган, дип искә төшерде ул.

Икътисади фаразларга һәм республиканың киләчәгенә килгәндә, Илдар Халиков белдергәнчә, 2014, 2015 нче һәм алдагы елларга фаразлар гади түгел. Шул ук вактыта ул ачыклык керткәнчә, төбәк тулай продуктының кимүенә карамастан, үсеш 2013 нче ел нәтиҗәләре буенча 2% тәшкил итә, Татарстанның күп предприятиеләренең кризислы хәлләргә иммунитеты бар. Сәнәгать предприятиеләре җитәкчеләре кризислы икътисади хәлләрдә нәрсә эшләргә кирәклеген беләләр һәм аңлыйлар, һәм Татарстан әлеге этапны лаеклы рәвештә узар дигән өмет бар.

“Актуальная тема” программасын алып баручының ТР территориясендә югары тизлекле магистраль төзелеше турындагы соравына җавап биргәндә, Илдар Халиков, әлегә аның маршруты расланмаган, диде.
Без Универсиададан соң, автомобильләр юлын төзү яхшы, югары тизлекле юллар төзелеше бик яхшы булуын аңлыйбыз, дип белдерде Татарстан Премьер-министры. “Югары тизлекле магистраль – бик мөһим проект, бу үз вакытындагы Байкал-Амур магистраленнән зуррак, - диде ул. – Һәм дәүләт акчаларын кая да булса кертергә тиеш булса, ул нәкъ менә мондый проектларга, инфраструктурага һәм аның үсешенә кертергә тиеш”.

Алдагы сорау - мәктәпкәчә белем бирү учреждениеләренә чират һәм балалар бакчасы өчен түләүләрнең артуы турында булды.
Илдар Халиков сүзләренчә, бүген балалар бакчасына түләүләрнең артуы белән бергә субсидияләрнең күләмен дә билгеләргә кирәк. Күбрәк тәэмин ителгән әти-әниләр тулы бәяне түләрлек, ә кемнәр мохтаҗ, алар судсидия алырлык итеп эшләргә кирәк, диде ул.


“Киләсе елда “Һәркемгә уңайлы мохит” программасы да дәвам ителәчәк. Ләкин проблемалар кимеми кебек, - дип мөрәҗәгать итте алып баручы ТР Министрлар Кабинеты башлыгына. – Пандуслар, төшү урыннары белән җиһазландыралар, юл аша чыгу урыннарында лифтлар куялар, ләин алар я эшләми, я алардан файдаланып булмый. Нәрсә эшләргә?”
Илдар Халиков фикеренчә, “бу чын эфир соравы”, кызганычка каршы, әлеге проблемалар бар.

Күп балалы гаиләләргә җир кишәрлекләре бирү мәсьәләсенә килгәндә, Илдар Халиков сүзләренчә, бүген Татарстан бу күрсәткеч буенча Россия төбәкләре арасында иң яхшы нәтиҗәләргә ия.
“Чыннан да, Казан үзәгендә мондый җир кишәрлекләре юк, - диде Илдар Халиков. – Ләкин без инженерлык инфраструктурасына ия җир кишәрлекләре булырга тиешлеген аңлыйбыз. Әйе, күп балалы гаиләләрнең бер өлеше аларга тәкъдим ителгән җирләрдән баш тартты, ләкин риза булучыларның саны күбрәк”.

ТР Министрлар Кабинетын формалаштыру, якын арада хатын-кыз министрларның артуын көтәргәме, юкмы турындагы сорауга, Илдар Халиков, Хөкүмәт, әлбәттә, гендер принцибы буенча түгел, ә министрларның эшләү сыйфатларыннан чыгып, формалаша, дип җавап бирде.

“Актуальная тема” алып баручысы Илдар Халиковтан түрәләрнең Иннополиска күченүләренә бәйле фикере белән кызыксынды - бу мөмкинме?
“Дәүләт органнарының бер урында туплануы – бу яхшы, - диде Илдар Халиков. – Ләкин үзәктәме яки читтәме - уйларга кирәк”. ТР Министрлар Кабинеты башлыгы дәүләт органнарының Иннополиска күченү мөмкинлеге турында сорауга -“Әйе дигәнче, күбрәк юк”, - диде. 2014 нче елда мондый күченү көтелми.

Илдар Халиков алып баручының соравына җавап биргәндә белдергәнчә, ул “Рубин”ның җанатары һәм клубта барган барлык вакыйгаларга битараф түгел. Ул Корбан Бердыевны, “Рубин”ны чемпионлыкка китергән бөек тренер буларак бәяли. “Без бөтенләй яңа “Рубин”ны алдык, - диде Илдар Халиков, ләкин соңгы вакытта ниндидер сәбәпләр аркасында килеп чыкмый”. Илдар Халиков клубта барган яңару процессларына өметен белдерде.
ТР Премьер-министры барлык Татарстанлыларга 2014 нче елда изгелек һәм бәхет теләде. Киләсе ел уңышлы булсын, һәм иң мөһиме - якыннарыбыз исән-сау һәм сәламәт булсын, диде Илдар Халиков.