Татарстанның икътисад министры Марат Сафиуллин: “Без 2008 елны яхшы күрсәткечләр белән тәмамлый алдык”

Бүген Татарстан Республикасы Министрлар Кабинетында Татарстанның икътисад министры Марат Сафиуллин 2008 елда Татарстан Республикасы социаль-икътисади үсешенең якынча нәтиҗәләрен әйтте.
“2004-2007 елларда Татарстанда күзәтелгән югары икътисади үсеш темпы 2008 елның тенденцияләрен билгеләде. Ел ахырында дөньякүләм финанс кризисының тәэсире сизелә башласа да, без 2008 елны шактый яхшы күрсәткечләр белән тәмамлый алдык”, - диде Марат Сафиуллин.
Министр 2008 елда Татарстан Республикасы социаль-икътисади үсешенең төп күрсәткечләрен әйтеп үтте. Тулай төбәк продукты чагыштырмача бәяләрдә 7,1 процентка арткан (бу – алдан бирелгән бәя, төгәлрәк мәгълүмат алганнан соң, әлеге санның 7,4 процентка җитүе дә ихтимал) һәм 930 млрд. сум тәшкил иткән (Россия буенча тулай төбәк продукты 6 процентка арткан). Кулланучылар бәясенең индексы узган елның декабренә 111,8% (Россия Федерациясе буенча – 113,5%) булган. Сәнәгый җитештерү индексы узган ел 104,2 процентка җиткән (Россия Федерациясе буенча – 102%).
Шул ук вакытта предприятиеләрнең чиста табышы кимегән: 2008 елда якынча 125 млрд. сумга калган (2007 елда – 160 млрд. сум).
2008 елда төп капиталга 247 млрд. сумлык инвестиция кертелгән. 2007 ел белән чагыштырганда, үсеш – 111% (Россия Федерациясе буенча – 109,2%). 2008 елда 2,222 млн.кв.м. торак йорт файдалануга тапшырылган, узган ел белән чагыштырганда, үсеш – 108,9%. Татарстанда хезмәт җитештерүчәнлеге (бер эшләүчегә) 2008 елда 6,7 процентка арткан (Россия буенча – 5,3%).
Марат Сафиуллин 2008 елның республикабыз авыл хуҗалыгы өчен алга китеш елы булуын әйтте. Агросәнәгать комплексының тулай продукты, узган ел белән чагыштырганда, 8 процентка артып (план 5,2% булган), 123 млрд. сум тәшкил иткән. Авыл хуҗалыгы тулай продуктының гомуми күләмендә үсемлекчелек продуктлары – 72 млрд. сум, терлекчелек продуктлары 51 млрд. сум тәшкил итә.
“Татарстан Республикасы Президенты куйган төп бурыч – социаль күрсәткечләрнең үсеш темплары икътисади күрсәткечләрдән ким булмаска тиеш. 2008 елда без хезмәт хакын арттыруда зур нәтиҗәләргә ирештек”, - дип ассызыклап үтте Татарстан Республикасының икътисад министры. Аның сүзләренә караганда, 2008 елда айлык уртача хезмәт хакы 14650 сум булган, ягъни 2007 ел белән чагыштырганда, 27,7 процентка (Россия Федерациясе буенча 27,4 процентка) арткан. Реаль хезмәт хакы 13 процентка үскән. Җан башына керемнәр 23,9 процентка җиткән. Икътисад секторларының тулай төбәк продукты үсешенә керткән өлеше: эшкәртү производстволары – 36% (2007 елда – 37,8 %), төзелеш – 22% (2007 елда – 7%), транспорт һәм элемтә - 18% (2007 елда – 8,1%), сәүдә - 14% (2007 елда – 22,8%), авыл хуҗалыгы – 6% (2007 елда – 5,4%), электр энергиясе, газ, су җитештерү һәм бүлү – 1% (2007 елда – 0,1%).